കടയ്ക്കാവൂർ: മൂന്ന് നൂറ്റാണ്ടുകൾക്ക് മുമ്പുള്ള പോരാട്ടത്തിന്റെ വീര്യമൊടുങ്ങാത്ത കഥകളുമായാണ് അഞ്ചുതെങ്ങ് കോട്ട തലയുയർത്തി നിൽക്കുന്നത്. ബ്രിട്ടീഷ് അധിനിവേശത്തിനെതിരെ നടന്ന ആദ്യ സായുധസമരമായ ആറ്റിങ്ങൽ കലാപത്തിന് (1721)​ സാക്ഷ്യംവഹിച്ച ഇടമാണ് അഞ്ചുതെങ്ങ് കോട്ട. തെങ്ങുകളുടെ നാട്ടിൽ അഞ്ചുതെങ്ങ് കോട്ടയ്ക്ക് അങ്ങനെയൊരു ചരിത്രപ്രാധാന്യമുണ്ട്. തിരുവനന്തപുരത്തുനിന്ന് തീരദേശപാതയിലൂടെ 30 കിലോമീറ്റർ സഞ്ചരിച്ചാൽ അഞ്ചുതെങ്ങ് കോട്ട കാണാം. റോഡിനും കടലിനും ഇടയ്ക്കാണ് കോട്ട. ഗോപുരം കടന്നാൽ മതിൽക്കെട്ടിനുള്ളിൽ മൈതാനം, പുൽത്തകിടി, ബ്രിട്ടീഷുകാരുടെ ശവകുടീരങ്ങൾ എന്നിവ കാണാം.

ചിതലരിക്കാത്ത ചരിത്രം

-----------------------------------------

മലഞ്ചരക്ക് കച്ചവടത്തിനായി തിരുവിതാംകൂറിലെത്തിയ ഇൗസ്റ്റ് ഇന്ത്യാ കമ്പനി 1684ൽ ആറ്റിങ്ങൽ റാണിയിൽ നിന്നു കടലോര പ്രദേശമായ അഞ്ചുതെങ്ങിൽ 281ഏക്കർ സ്ഥലം പതിച്ചുവാങ്ങിയാണ് കോട്ട നിർമ്മിച്ചത്. കമ്പനിയുടെ സൈനിക കേന്ദ്രം കൂടിയായിരുന്നു ഇത്. ഇംഗ്ളണ്ടിൽ നിന്നു വരുന്ന കപ്പലുകൾക്ക് സിഗ്നൽ സ്റ്റേഷനായും കോട്ട പ്രവർത്തിച്ചിരുന്നു. ഇതിനായി സമീപത്ത് ലൈറ്റ് ഹൗസും സ്ഥാപിച്ചു.

വേലുത്തമ്പി ദളവയും മെക്കാളെ പ്രഭുവും തമ്മിൽ 1805ൽ സന്ധിക്കരാർ ഉണ്ടാക്കിയത് ഇവിടെയായിരുന്നുവെന്നാണ് ചരിത്രരേഖകൾ.

കലാപത്തിന്റെ തുടക്കം

----------------------------​​​​--------------

കച്ചവടം അധിനിവേശത്തിലേക്ക് മാറിയപ്പോൾ ഏറെ വൈകാതെ സ്ഥലവാസികളും കമ്പനിയും തമ്മിലുള്ള ബന്ധം ഉലഞ്ഞു. 1697ൽ റാണിയും കമ്പനിയും തമ്മിലുണ്ടാക്കിയ കരാറനുസരിച്ച് തിരുവിതാംകുറിൽ കുരുമുളകിന്റെ കച്ചവടം കമ്പനിയുടെ കുത്തകയായി മാറി. ഇതിൽ പ്രതിഷേധിച്ച് പല സ്ഥലങ്ങളിലുള്ള ജനങ്ങളുടെ സഹകരണത്തോടെ 1697ൽ നാട്ടുകാർ കോട്ട ആക്രമിച്ചു. ബ്രിട്ടീഷുകാർ സമരത്തെ അടിച്ചമർത്തിയെങ്കിലും കർഷകരും സ്ഥലവാസികളും തമ്മിലുള്ള ബന്ധം കൂടുതൽ ശക്തമായി. 1721ൽ കോട്ടയുടെ അധിപൻ മേജർ ഗീഫോർഡിന്റെ നേതൃത്വത്തിൽ 150 ഒാളം ബ്രിട്ടീഷ് പട്ടാളക്കാർ റാണിക്ക് സമ്മാനങ്ങളുമായി കോട്ടയിൽ നിന്ന് ആറ്റിങ്ങലിലേക്ക് പോകുന്ന വിവരം നാട്ടുകാർ അറിഞ്ഞു. തദ്ദേശവാസികൾ കടയ്ക്കാവൂർ ഏലാപ്പുറത്തുവച്ച് പട്ടാളത്തെ ആക്രമിച്ചു. മേജർ ഗീഫോർഡ് ഉൾപ്പെടെ 140 പട്ടാളക്കാർ യുദ്ധത്തിൽ മരിച്ചുവീണു. വാമനപുരം നദിയിലേക്ക് നാട്ടുകാർ മൃതദേഹങ്ങൾ വലിച്ചെറിഞ്ഞെന്നാണ് ചരിത്രരേഖ. തുടർന്നാണ് ആ പ്രദേശത്തിന് കൊല്ലംപുഴ എന്ന പേരുണ്ടായതത്രേ. ബ്രിട്ടീഷ് അധിനിവേശത്തിനെതിരെ ഇന്ത്യയിൽ നടന്ന ആദ്യ സായുധ സമരമായിരുന്നു ഇത്. പിന്നീട് ഈ സമരം ആറ്റിങ്ങൽ കലാപം എന്ന് അറിയപ്പെട്ടു.

അഞ്ചുതെങ്ങ് കോട്ട - വർഷങ്ങളിലൂടെ
-------------------------------------------------------------

1684 - ആറ്റിങ്ങൽ റാണിയിൽ നിന്നു ബ്രിട്ടീഷുകാർ സ്ഥലം പതിച്ചുവാങ്ങി

1695 - റാണിയുടെ അനുമതിയോടെ അ‌ഞ്ചുതെങ്ങിൽ കോട്ട നിർമ്മിച്ചു

1697- കച്ചവടം കൈയടക്കിയതിൽ പ്രതിഷേധിച്ച് നാട്ടുകാർ കോട്ട ആക്രമിച്ചു

1721 ​- കൊട്ടാരത്തിലേക്ക് പോയ സൈന്യത്തെ നാട്ടുകാർ ആക്രമിച്ചു

(ഇതാണ് ആറ്റിങ്ങൽ കലാപം)​

1805 - വേലുത്തമ്പി ദളവയും മെക്കാളെ പ്രഭുവും സന്ധിക്കരാർ ഉണ്ടാക്കി