കിളിമാനൂർ: സംസ്ഥാന പാതയിലെ പ്രധാന ജംഗ്ഷനുകളിൽ ഒന്നായ കാരേറ്റിൽ റോഡ് നിർമ്മാണം തുടങ്ങിയിട്ടും ഗതി പഴയതു തന്നെ. കോടികൾ മുടക്കി കെ.എസ്.ടി.പി.യുടെയും, പി.ഡബ്ല്യൂ.ഡിയുടെയുമൊക്കെ നേതൃത്വത്തിൽ പുനർനിർമ്മാണവും വികസനവും നടത്തിയെങ്കിലും കാരേറ്റിലെ അശാസ്ത്രീയമായ റോഡ് നിർമ്മാണം ഇവിടെ കൂടുതൽ ഗതാഗത കുരുക്കുണ്ടാക്കുന്നു. നാല് റോഡുകൾ സന്ധിക്കുന്ന കാരേറ്റ് ജംഗ്ഷനിൽ നിന്ന് കല്ലറയിലേക്കുള്ള റോഡ് നിർമ്മാണം ആരംഭിച്ചിട്ട് മാസങ്ങളായെങ്കിലും പണി ഇതുവരെ പകുതി പോലും പൂർത്തിയായിട്ടില്ല. ഇവിടുള്ളവർ യാത്രാദുരിതം അനുഭവിക്കാൻ തുടങ്ങിയിട്ട് മാസങ്ങൾ കഴിഞ്ഞു. റോഡ് പണി പൂർത്തിയാക്കണം എന്നാവശ്യപ്പെട്ട് വിവിധ രാഷ്ട്രീയ പാർട്ടികളുടെ നേതൃത്വത്തിൽ സമര പരിപാടികൾ നടത്തുമ്പോൾ റോഡ് പണി പുനരാരംഭിക്കുമെങ്കിലും വൈകാതെ പണി നിറുത്തിവയ്ക്കുകയാണ് പതിവ്. മലയോര ഗ്രാമങ്ങളെ ബന്ധിപ്പിച്ച് പൊൻമുടിയിൽ എത്തുന്ന പ്രധാന വിനോദ സഞ്ചാര പാതയായിട്ടും അധികൃതർ കണ്ണടയ്ക്കുകയാണെന്നാണ് ആക്ഷേപം. എത്രയും വേഗം കരാറിൽ പറഞ്ഞ പ്രകാരം പണി ചെയ്ത് റോഡ് ഗതാഗതയോഗ്യമാക്കണം എന്നാണ് നാട്ടുകാരുടെ ആവശ്യം.