ചേർത്തല : വടക്കേ അങ്ങാടിക്കവല വികസനത്തിന്റെ ഭാഗമായി കവലയിലുള്ള മരം അടുത്തയാഴ്ച മുറിച്ചു മാറ്റും.ഇതോടെ കെ.എസ്.ഇ.ബിയുടെ ട്രാൻസ്‌ഫോർമർ മാ​റ്റാനുള്ള തടസങ്ങൾ നീങ്ങും.കവലയിലെ ട്രാൻസ്‌ഫോർമറും അനുബന്ധ പോസ്​റ്റുകളും മാ​റ്റുന്നതിനായി പൊതുമരാമത്തു വകുപ്പ് 17 ലക്ഷം രൂപയാണ് കെ.എസ്.ഇ.ബിക്ക് കൈമാറിയത്.
കവലവികസനത്തിനായി 27 സ്ഥല ഉടമകളിൽ നിന്നും 43 സെന്റ് സ്ഥലമാണ് ഏ​റ്റെടുക്കുന്നത്.ഏ​റ്റെടുക്കുന്ന സ്ഥലത്തുണ്ടായിരുന്ന 65 കടമുറികളിൽ 90 ശതമാനവും ഒഴിഞ്ഞു.സ്ഥലമുടമകളിൽ 23 പേർ പ്രമാണം കൈമാറി. ആധാരം രജിസ്​റ്റർ ചെയ്യുന്ന മുറക്ക് കടകൾ പൊളിക്കും.മന്ത്രി പി.തിലോത്തമൻ മുൻകൈയെടുത്ത്, സ്ഥലം ഏ​റ്റെടുക്കുന്നതിന് 5.81 കോടി ഉൾപ്പെടെ 8.5 കോടിയാണ് കവല വികസനത്തിനായി അനുവദിച്ചിട്ടുള്ളത്.