ചേർത്തല: നിറുത്തലാക്കിയ അരൂക്കുറ്റി- തിരുവനന്തപുരം ഫാസ്റ്റ് പാസഞ്ചറിനു പകരം ഇന്നു മുതൽ സൂപ്പർഫാസ്റ്റ് സർവ്വീസ് ആരംഭിക്കാൻ കെ.എസ്.ആർ.ടി.സി തീരുമാനിച്ചു. എറണാകുളം- ആലപ്പുഴ ഫാസ്​റ്റ് പാസഞ്ചർ ചെയിൻ സർവീസ് ആരംഭിക്കുന്നതിന്റെ ഭാഗമായി വർഷങ്ങൾ പഴക്കമുള്ള സർവീസ് നിറുത്തലാക്കാനുള്ള തീരുമാനം വൻ പ്രതിഷേധത്തിനു വഴിയൊരുക്കിയിരുന്നു.

സി.പി.എം ചേർത്തല ഏരിയ സെക്രട്ടറി കെ.രാജപ്പൻനായരുടെ നേതൃത്വത്തിലുള്ള പ്രവർത്തകരും പിന്നാലെ യൂത്ത് കോൺഗ്രസുകാരും പ്രതിഷേധത്തിന്റെ ഭാഗമായി എ.ടി.ഒയെ ഉപരോധിച്ചിരുന്നു. ഇന്നലെ അരൂക്കു​റ്റി, പാണാവള്ളി, പെരുമ്പളം,പള്ളിപ്പുറം,തൈക്കാട്ടുശേരി ഗ്രാമപഞ്ചായത്തുകളിലെയും തൈക്കാട്ടുശേരി ബ്ലോക്ക് പഞ്ചായത്തിലെയും ജില്ലാപഞ്ചായത്തിലെയും ജനപ്രതിനിധികളെ അണിനിരത്തി എൽ.ഡി.എഫ് നേതൃത്വത്തിലും എ.ടി.ഒ യെ ഉപരോധിച്ചു. തുടർന്നു നടന്ന ചർച്ചകളിലാണ് ഇന്നു മുതൽ സൂപ്പർഫാസ്​റ്റ് സർവീസ് ആരംഭിക്കാൻ ധാരണയായത്.

ഫാസ്​റ്റ്പാസഞ്ചറിനു സമാനമായി അരൂക്കുറ്റിയിൽ നിന്ന് ചേർത്തല വരെയുള്ള പ്രധാന സ്​റ്റോപ്പുകളിൽ ബസ് നിറുത്തും. ജില്ലാപഞ്ചായത്തംഗം പി.എം.പ്രമോദ്, ഗ്രാമപഞ്ചായത്ത് പ്രസിഡന്റുമാരായ ആബിദ അസീസ്,പി.ആർ.ഹരിക്കുട്ടൻ,ജനപ്രതിനിധികളായ ബി.വിനോദ്, പി.കെ.കൊച്ചപ്പൻ, മുംതാസ്, രാജേഷ് വിവേകാനന്ദൻ, ഷിൽജാ സലിം എന്നിവർ നേതൃത്വം നൽകി.