മാന്നാർ: ആത്മബോധോദയ സംഘത്തിന്റെ കേന്ദ്ര സ്ഥാപനമായ ചെറുകോൽ ശ്രീശുഭാനന്ദാശ്രമത്തിൽ മാത്രം മൂന്നു മാസം കൂടുമ്പോൾ നടത്തപ്പെടുന്ന താരാസ്തുതി മഹായജ്ഞം ചൊവ്വാഴ്ച പ്രഭാതത്തിൽ ആശ്രമാധിപതി ദേവാനന്ദ ഗുരുദേവന്റെ അനുഗ്രഹപ്രഭാഷണത്തോടുകൂടി സമാരംഭിച്ചു. പ്രഭാതത്തിൽ ഗുരുപൂജ, ഗുരുദക്ഷിണ, പ്രാർത്ഥന, ആശ്രമപ്രദക്ഷിണം എന്നിവ നടന്നു. കേരളത്തിനകത്തും പുറത്തു നിന്നും അനേകം ഭക്തജനങ്ങൾ 21 ദിവസത്തെ പരിശുദ്ധ വ്രതത്തോടുകൂടി സർവദോഷശാന്തിക്കും ഈശ്വരാനുഗ്രഹത്തിനുമായി മഹായജ്ഞത്തിൽ പങ്കെടുക്കുന്നു. ഞായറാഴ്ച വരെ നീണ്ടു നിൽക്കുന്ന ഈ മഹായജ്ഞത്തിൽ രാപ്പകൽ നാമസങ്കീർത്തനാലാപവും പ്രാർത്ഥനയും അന്നദാനം എന്നിവ നടക്കും . 25 ന് എതിരേല്പ്, ആശ്രമപ്രദക്ഷിണം, ദീപക്കാഴ്ച, ശംഖനാദം, മണിനാദം, ഓങ്കാരധ്വനി തുടങ്ങിയ ചടങ്ങുകളോടെ സ്തുതി സമാപിക്കും.