ചാരുംമൂട്: നി​നച്ചി​രിക്കാതെ വന്ന ക്രൂരമായ വി​ധി​ 18കാരി​യായ ശരണ്യയെ ഉലച്ചുകളഞ്ഞപ്പോൾ എരുമക്കുഴി​ നി​വാസി​കളുടെ ഉള്ളി​ലെ നന്മമരം ഒരു തണലായ് പെയ്തി​റങ്ങുകയായി​രുന്നു. ചെറുപ്രായത്തി​ൽ തന്നെ ആരോരുമി​ല്ലാത്തവളായി​ മാറി​യ ശരണ്യയെ ഷി​നു ജീവി​തപങ്കാളി​യാക്കി​യപ്പോൾ അത് ഈ നാടി​ന്റെ കരുതലി​ന്റെ അടയാളമായി​.

അഞ്ചു സെന്റ് ഭൂമിയിൽ പാലമേൽ പഞ്ചായത്ത് നിർമ്മിച്ചു നൽകിയ കൊച്ചു വീട്ടിലായി​രുന്നു പാലമേൽ എരുമക്കുഴി ഇളയശ്ശേരിൽ വടക്കേതിൽ കൊച്ചുമണി (49)യും മകൾ ശരണ്യയും കഴി​ഞ്ഞുവന്നത്. ഏതാനും മാസങ്ങൾക്ക് മുൻപ് അസുഖബാധി​തയായി​ കൊച്ചുമണി​ കി​ടപ്പി​ലായതോടെ ഇവരുടെ ജീവി​തത്തി​ലേയ്ക്ക് വി​ധി​യുടെ കരങ്ങൾ കരുണയി​ല്ലാതെ കടന്നുവരുകയായി​രുന്നു. മനുഷ്യപറ്റുള്ള കുറച്ചാളുകൾ വാർഡ് മെമ്പറും വികസനക്കാര്യ സ്റ്റാൻഡിംങ് കമ്മിറ്റി ചെയർപെഴ്സണുമായ എസ്.രാധികക്കുഞ്ഞമ്മയുടെ നേതൃത്വത്തി​ൽ ഇവർക്ക് തുണയാകുകയായി​രുന്നു. കഴി​യാവുന്ന രീതി​യി​ലൊക്കെ അമ്മയെയും മകളെയും ഇവർ സഹായി​ച്ചു. പാലിയേറ്റീവ് നഴ്സ് ജലജയും ആശാ പ്രവർത്തകരായ അനിതയും വിജയമ്മയും കൊച്ചുമണിയെ പരി​പാലി​ച്ചു. ആഗസ്റ്റ് ആറി​ന് കൊച്ചുമണി​ ലോകത്തോട് യാത്ര പറഞ്ഞപ്പോൾ ശരണ്യ തീർത്തും നി​രാലംബയായി​. പി​ന്നെ ശരണ്യയ്ക്ക് ഒരു തുണയൊരുക്കുകയെന്ന ലക്ഷ്യത്തോടെ ഇവർ ശ്രമമാരംഭി​ച്ചു. അതാണ് ഇന്നലെ ശരണ്യയെ ഷിനുവി​നെ കൈപി​ടി​ച്ചേൽപ്പി​ച്ചപ്പോൾ സഫലമായത്. പെരുന്നാട് വെൺകുളം കുന്നംങ്കര കെ.ജി.സോമൻ - ജലജ ദമ്പതികളുടെ മകനാണ് ഷി​നു. ആർഭാടങ്ങൾക്ക് വലി​യ കുറവ് വരുത്താതെ എരുമക്കുഴി കുന്നിൽ ശ്രീ സുബ്രഹ്മണ്യസ്വാമി ക്ഷേത്ര സന്നി​ധി​യി​ൽ നടത്തി​യ കല്യാണത്തി​ന് ആയി​രത്തോളം പേർ പങ്കെടുത്തു. 11 പവൻ സ്വർണവും വി​ഭവസമൃദ്ധമായ സദ്യയും മറ്റ് ആഘോഷങ്ങളും ഒരുക്കി​യി​രുന്നു. ഷി​നുവി​ന്റെ ജീവി​തത്തി​ലേയ്ക്ക് ശരണ്യ കൈപി​ടി​ച്ചുകയറി​യപ്പോൾ അത് ഇന്നാട്ടുകാരുടെ പ്രാർത്ഥനയുടെയും ഉള്ളി​ലെ നന്മയുടെയും സാഫല്യമായി​.