കൊച്ചി : രാജ്യത്ത് ഏറ്റവുമധികം ആരാധകരുള്ള ഫുട്‌ബാൾ ക്ലബെന്ന പെരുമ കേരള ബ്ലാസ്റ്റേഴ്‌സ് സ്വന്തമാക്കി. ഇന്ത്യൻ സൂപ്പർലീഗിൽ പങ്കെടുക്കുന്ന 10 ടീമുകളിൽ ഏറ്റവും കൂടുതൽ ആരാധകരുള്ള കേരള ബ്ലാസ്റ്റേഴ്‌സിന്റെ ഔദ്യോഗിക ഇൻസ്റ്റഗ്രാം പേജ് പിന്തുടരുന്നവർ പത്തുലക്ഷം (ഒരു മില്യൺ ) കവിഞ്ഞു. ഐ.എസ്.എല്ലിൽ കളിക്കുന്ന മറ്രൊരു ടീമിനും ഇൻസ്റ്റഗ്രാമിൽ ഇത്രയും ആരാധകരില്ല.

2014 മേയ് 14ന് ഐ.എസ്.എല്ലിൽ കളിച്ച എട്ടു ക്ലബുകളിൽ ഒന്നായി രൂപം കൊണ്ടതാണ് കേരള ബ്ലാസ്റ്റേഴ്‌സ്. ഫേസ്ബുക്ക്, ട്വിറ്റർ, ഇൻസ്റ്റഗ്രാം എന്നീ സാമൂഹിക മാദ്ധ്യമങ്ങളിൽ കൂടി 3.9 ദശലക്ഷം ആരാധകർ ടീമിനുണ്ട്. ഏഷ്യയിൽ ഏറ്റവും കൂടുതൽ ആരാധകരുള്ള അഞ്ചാമത്തെ ഫുട്‌ബാൾ ക്ലബുമാണ് കേരള ബ്ലാസ്റ്റേഴ്‌സ്.

ഐ.എസ്.എല്ലിലെ മൊത്തം കാഴ്ചക്കാരിൽ 45 ശതമാനവും കേരള ബ്ലാസ്റ്റേഴ്‌സിന്റെ കളികൾക്കാണുള്ളത്. കേരളത്തിലെ ഏറ്റവും അധികം ആളുകൾ കണ്ട ആദ്യം പത്തു പരിപാടികളിൽ സ്ഥിരമായി കേരള ബ്ലാസ്റ്റേഴ്‌സിന്റെ കളികൾ ഉൾപ്പെടുന്നു. ഏറ്റവും അധികം ആരാധകർ സ്റ്റേഡിയത്തിൽ തിങ്ങിക്കൂടുന്ന 10 യൂറോപ്പ് ഇതര ടീമുകളിൽ ഒന്നാണ് കേരള ബ്ലാസ്റ്റേഴ്‌സ്. അഞ്ചു വർഷക്കാലമായി ശരാശരി 40,000 ആരാധകരാണ് കളി കാണാനാനെത്തുന്നത്. 2018 ലെ 'ഐ.എസ്.എൽ ബെസ്റ്റ് പിച്ച് ഒഫ് ദി ഇയർ പുരസ്‌കാരം' ബ്ലാസ്റ്റേഴ്‌സ് കരസ്ഥമാക്കിയിരുന്നു

ഏഷ്യയിലെ ഏറ്റവും വലിയ ക്ലബായി മാറുന്നതിനുള്ള യാത്രയിലാണ് ടീമെന്ന് കേരള ബ്ലാസ്റ്റേഴ്‌സ് സി.ഇ.ഒ വിരേൻ ഡി. സിൽവ പറഞ്ഞു.