ആലുവ: യുവാക്കൾ നാല് അടിയോളം വെള്ളമുളള റോഡിലേക്ക് കാർ ഓടിച്ചിറിക്കി. പൊലീസെത്തി​ ഇരുവരെയും താക്കീത് നൽകി വിട്ടയച്ചു.

നഗരത്തോട് ചേർന്ന എടയപ്പുറം ടൗൺഷിപ്പ് റോഡിൽ വെള്ളിയാഴ്ച്ച രാത്രി 12 മണിയോടെയാണ് സംഭവം. എസ്.പി ഓഫീസിനോട് ചേർന്നുള്ള നേതാജി റോഡ് വഴി ടൗൺഷിപ്പ് റോഡിലേക്കെത്തിയ സ്വിഫ്റ്റ് കാർ ആണ് വെള്ളം കണ്ടി​ട്ടും മുന്നോട്ടെടുത്തത്. വെള്ളത്തി​ലി​റങ്ങി​യ ഉടൻ കാർ ഓഫായി​. മുഴുവൻ മുങ്ങുകയും ചെയ്തു. സമീപത്തെ ഫ്ളാറ്റിൽ ഉണ്ടായിരുന്നവരാണ് വിവരം പൊലീസിനെ അറിയിച്ചത്. ഇതിനിടെ ഡ്രൈവറും മറ്റൊരാളും ഒരുവിധം പുറത്തിറങ്ങി. ഒരാൾ എടയപ്പുറം സ്വദേശിയും രണ്ടാമൻ ഏലൂർ സ്വദേശിയുമാണ്. കുറച്ചുദിവസം സ്ഥലത്തുണ്ടായിരുന്നില്ലെന്നും റോഡ് വെള്ളത്തിൽ മുങ്ങിയത് ശ്രദ്ധി​ച്ചി​ല്ലെന്നുമാണ് പൊലീസിനോട് പറഞ്ഞത്. കാറിലുണ്ടായിരുന്നവരെ താക്കീത് ചെയ്ത് വിട്ടയച്ചതായി ആലുവ സി.ഐ രാജേഷ് കുമാർ പറഞ്ഞു.

ടൗൺ ഷിപ്പ് റോഡിന് ഇരുവശവും പാടശേഖരമാണ്. പരിസരം പുഴ പോലെ കിടക്കുകയാണ്. ഇന്നലെ രാവിലെ നാട്ടുകാരാർ ചേർന്നാണ് കാർ കരയിലേക്ക് വലിച്ചു കയറ്റിയത്.