മൂവാറ്റുപുഴ: പ്രളയബാധിതരുടെ കണ്ണീരൊപ്പാൻ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നൽകി ഓട്ടോ തൊഴിലാളികൾ മാതൃകയായി. കഴിഞ്ഞ ആറ് വർഷമായി പെരുമറ്റം ആസ്ഥാനമായി പ്രവർത്തിക്കുന്ന ഓട്ടോറിക്ഷ തൊഴിലാളികളുടെ കൂട്ടായ്മയായ പെരുമറ്റം ഓട്ടോറിക്ഷ തൊഴിലാളി യൂണിയന്റെ നേതൃത്വത്തിലാണ് ദുരിതാശ്വാസ നിധിയിലേക്കുള്ള 25000 രൂപയുടെ ചെക്ക് എൽദോ എബ്രഹാം എം.എൽ.എയ്ക്ക് കൈമാറിയത്. യൂണിയൻ പ്രസിഡന്റ് പി.എം. ബഷീർ, സെക്രട്ടറി പി.എം. പരീത്, ട്രഷറർ വി.വി. നിഷാദ്, ഭാരവാഹികളായ വി.എസ്. അഹമ്മദ്, കെ.പി. അനസ്, ഒ.എം. ജമാൽ, ടി.എം. ഷൈഫൽ, കെ.കെ. ഷാജി എന്നിവരുടെ നേതൃത്വത്തിൽ ചെക്ക് കൈമാറി.

പെരുമറ്റത്ത് ജീവകാരുണ്യ പ്രവർത്തന രംഗത്ത് നിറസാന്നിദ്ധ്യമായ പെരുമറ്റം ഓട്ടോറിക്ഷ തൊഴിലാളി യൂണിയൻ ഇതുവരെ കിഡ്‌നി, കരൾ മാറ്റിവയ്ക്കൽ ശസ്ത്രക്രിയക്കടക്കം 10 ലക്ഷം രൂപയുടെ ചാരിറ്റി പ്രവർത്തനങ്ങൾ നടത്തിയിട്ടുണ്ടന്നും ഭാരവാഹികൾ പറഞ്ഞു. ഒരു ഓട്ടോറിക്ഷ തൊഴിലാളിയിൽ നിന്നും ദിവസേന 10 രൂപ വച്ച് സ്വരൂപിച്ചാണ് ചാരിറ്റി പ്രവർത്തനങ്ങൾ നടത്തുന്നത്.