പാലാ: പാലാ സിവിൽ സർവീസ് ഇൻസ്റ്റിറ്റ്യൂട്ടിന്റെ പുതിയ ആസ്ഥാന മന്ദിരത്തിന്റെ ശിലാസ്ഥാപനം ഇന്ന് 2.30 ന് പാലാ ബിഷപ്പ് മാർ ജോസഫ് കല്ലറങ്ങാട്ട് നിർവ്വഹിക്കുമെന്ന് പ്രിൻസിപ്പൽ ഡോ. ജോസഫ് വെട്ടിക്കൻ, വൈസ് പ്രിൻസിപ്പൽമാരായ പ്രൊഫ. ജോർജ് ജോസഫ് , ഡോ. ബേബി തോമസ് എന്നിവർ അറിയിച്ചു.

പ്രളയ ദുരന്തത്തിന്റെ പശ്ചാത്തലത്തിൽ വളരെ ലളിതമായാണ് ശിലാ സ്ഥാപന ചടങ്ങുകൾ നടക്കുന്നത്.

പാലാ സെന്റ് തോമസ് കോളജ് ഗ്രൗണ്ടിനോടു ചേർന്ന് അരുണാപുരം സെന്റ് തോമസ് പള്ളി റോഡ് വക്കിലാണ് ആറു നില മന്ദിരം പണിതുയർത്തുന്നതെന്ന് പ്രിൻസിപ്പൽ പ്രൊഫ. ഡോ. ജോസഫ് വെട്ടിക്കൻ പറഞ്ഞു. ആദ്യഘട്ട നിർമ്മാണത്തിനു തന്നെ ഏഴു കോടിയിൽപ്പരം രൂപാ ചെലവഴിക്കും.

വിശാലമായ കാർ പാർക്കിംഗ് സൗകര്യത്തോടു കൂടി നിർമ്മിക്കുന്ന മന്ദിരത്തിന്റെ ആദ്യ നിലയിൽ ഓഫീസും 3 ക്ലാസ്സ് റൂമും ഉണ്ട്. രണ്ടാം നിലയിൽ വിശാലമായ ലൈബ്രറിയാണ്. തുടർന്നുള്ള നിലകളിൽ വിപുലമായ ക്ലാസ് റൂമുകളും മുകൾ നിലയിൽ വിശാലമായ ഓഡിറ്റോറിയവുമുണ്ടാകും.

'സിവിൽ സർവീസ് കോംപ്ലക്‌സ് ' എന്ന് പേരിട്ടിരിക്കുന്ന ആധുനിക മന്ദിരം പൂർത്തിയാവുന്നതോടെ ആയിരത്തോളം ഉദ്യോഗാർത്ഥികൾക്ക് ഇവിടെ ഒരേ സമയം പരിശീലനം കൊടുക്കാൻ കഴിയും.

ബിഷപ്പ് മാർ ജോസഫ് കല്ലറങ്ങാട്ടിനൊപ്പം മാർ ജോസഫ് പള്ളിക്കാപ്പറമ്പിൽ, ചങ്ങനാശ്ശേരി, പാലാ, കാഞ്ഞിരപ്പള്ളി രൂപതകളിലെ വൈദിക ശ്രേഷ്ഠർ, ജോസ് കെ. മാണി എം.പി, എം എൽ . എ മാരായ പി.സി. ജോർജ്, മോൻസ് ജോസഫ്, മുൻ എം.പി. മാരായ വക്കച്ചൻ മറ്റത്തിൽ, ജോയി എബ്രഹാം , മുൻ എം.എൽ. എ പ്രൊഫ. വി.ജെ. ജോസഫ് , പാലാ നഗരസഭാ സാരഥികളായ ബിജി ജോജോ, കുര്യാക്കോസ് പടവൻ , മുൻ വൈസ് ചാൻസിലർമാരായ ഡോ. സിറിയക് തോമസ്, ഡോ. ബാബു സെബാസ്റ്റ്യൻ തുടങ്ങിയവർ പങ്കെടുക്കും.

1998ൽ പാലാ, ചങ്ങനാശ്ശേരി, കാഞ്ഞിരപ്പള്ളി രൂപതകളുടെ സംയുക്ത സംരംഭമായി ആരംഭിച്ച പാലാ സിവിൽ സർവീസ് ഇൻസ്റ്റിറ്റ്യൂട്ടിന് ഇതിനോടകം മുന്നൂറോളം സിവിൽ സർവീസ് ഉദ്യോഗസ്ഥരെ രാജ്യത്തിന് സംഭാവന ചെയ്യാൻ കഴിഞ്ഞിട്ടുണ്ട്. കേരള കേഡറിലെ മുപ്പതോളം സിവിൽ സർവീസ് ഉദ്യോഗസ്ഥർ ഇവിടുത്തെ പൂർവ വിദ്യാർത്ഥികളാണ്. മസ്സൂറിയിൽ സിവിൽ സർവീസ് ജേതാക്കൾക്ക് പരിശീലനം കൊടുക്കുന്ന ഐ.എ. എസ്. അക്കാഡമിയുടെ നിലവിലെ ഡയറക്ടർ എസ്. അശ്വതിയും പാലാ ഇൻസ്റ്റിറ്റ്യൂട്ടിൽ സിവിൽ സർവീസ് പരീക്ഷാ പരിശീലനം നേടിയ ആളാണ്. ഫാ. ഫിലിപ്പ് ഞരളക്കാട്ട്, പ്രൊഫ. ഡോ. ജോസഫ് വെട്ടിക്കൻ, ഡോ. മാത്യൂ ജോസഫ്, ഡോ. ബേബി തോമസ്, പ്രൊഫ. ജോർജ് ജോസഫ് എന്നിവരുടെ നേതൃത്വത്തിലാണ് പാലാ സിവിൽ സർവീസ് ഇൻസ്റ്റിറ്റ്യൂട്ടിന്റെ ദൈനം ദിന പ്രവർത്തനം. ആരംഭകാലം മുതൽ റവ. ഡോ. ഫിലിപ്പ് ഞരളക്കാട്ടാണ് മനേജർ. 2010ൽ പ്രൊഫ. ഡോ. ജോസഫ് വെട്ടിക്കൻ പ്രിൻസിപ്പലായതോടെ അക്കാഡമിക്ക് രംഗത്ത് നേട്ടങ്ങളുടെ പെരുമഴ തന്നെ ഈ സ്ഥാപനത്തിനുണ്ടായി. എം.ജി. യൂണിവേഴ്‌സിറ്റി മുൻ വൈസ് ചാൻസിലർ ഡോ. സിറിയക് തോമസ് അക്കാഡമിക് ഡീൻ ആണ്.