നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ ഡയറക്ടറേറ്റ് ഓഫ് റവന്യു ഇന്റെലിജൻസ് വിഭാഗം നടത്തിയ മിന്നൽ പരിശോധനയിൽ 3.40 കിലോഗ്രാം സ്വർണ മിശ്രിതം പിടികൂടി. രണ്ട് വിമാനങ്ങളിലായി എത്തിയ യാത്രക്കാരിൽ നിന്നാണ് ഇത്രയധികം സ്വർണ മിശ്രിതം പിടികൂടിയത്.

മലപ്പുറം മഞ്ചേരി സ്വദേശി നൗഷാദിൽ നിന്നും 1.96 കിലോഗ്രാം സ്വർണ മിശ്രിതമാണ് പിടികൂടിയത്. എമിറേറ്റ്‌സ് വിമാനത്തിൽ ദുബൈയിൽ നിന്നാണ് ഇയാൾ നെടുമ്പാശേരിയിൽ എത്തിയത്. അബുദാബിയിൽ നിന്നുള്ള ഇത്തിഹാദ് വിമാനത്തിൽ എത്തിയ യാസിം എന്നയാൾ 1.44 കിലോഗ്രാം സ്വർണ മിശ്രിതമാണ് അനധികൃതമായി കടത്താൻ ശ്രമിച്ചത്. പിടിയിലായ ഇരുവരും ശരീരത്തിലാണ് മിശ്രിതം ഒളിപ്പിച്ചിരുന്നത്. സ്വർണം കടത്തുന്നതായുള്ള രഹസ്യ വിവരം ലഭിച്ചതിനെ തുടർന്നാണ് ഡി.ആർ.ഐ ഉദ്യോഗസ്ഥർ വിമാനത്താവളത്തിൽ പരിശോധനക്കെത്തിയത്. രണ്ട് പേരിൽ നിന്നായി പിടികൂടിയ സ്വർണ മിശ്രിതത്തിൽ നിന്നും ഒരു കോടിയോളം രൂപ വിലവരുന്ന സ്വർണം വേർതിരിച്ചെടുക്കാനാകും.

രാജ്യത്ത് സ്വർണ്ണവില കുതിച്ച് ഉയരുന്നതുമൂലം കള്ളക്കടത്ത് സജീവമാകുമെന്ന് രഹസ്യവിവരം ലഭിച്ചതിനെ തുടർന്ന് കേരളത്തിലെ നാല് വിമാനതാവളങ്ങളിലും പരിശോധന ശക്തമാക്കിയിട്ടുണ്ട്