പറവൂർ : എസ്.എൻ.ഡി.പി യോഗം പറവൂർ യൂണിയന്റെ ആഭിമുഖ്യത്തിൽ ശ്രീനാരായണഗുരുദേവന്റെ 165-ാമത് ജയന്തി ആഘോഷങ്ങളുടെ ഭാഗമായുള്ള ശ്രീനാരായണ ദിവ്യജ്യോതി പര്യടനത്തിന്റെ ഉദ്ഘാടനം ഇന്ന് നടക്കും. ഉച്ചയ്ക്ക് രണ്ടിന് ആലുവ അദ്വൈതാശ്രമത്തിൽ നിന്നും ദിവ്യജ്യോതി യൂത്ത്മൂവ്മെന്റ് അത് ലറ്റുകൾ നൂറുകണക്കിന് ഇരുചക്രവാഹനങ്ങളുടെ അകമ്പടിയോടെ പഴയ യൂണിയൻ പരിസരത്ത് എത്തിക്കും. ഇവിടെ നിന്നും വാദ്യമേളങ്ങളുടെ അകമ്പടിയിൽ പുതിയ യൂണിയൻ ഓഡിറ്റോറിയത്തിലേയ്ക്ക് ആനയിക്കും.വൈകിട്ട് 5.30ന് ജ്യോതിപര്യടന ഉദ്ഘാടനം എസ്.എൻ.ഡി.പി യോഗം ദേവസ്വം സെക്രട്ടറി അരയാക്കണ്ടി സന്തോഷ് നിർവ്വഹിക്കും. യൂണിയൻ പ്രസി‌ഡന്റ് സി.എൻ. രാധാകൃഷ്ണൻ അദ്ധ്യക്ഷത വഹിക്കും. മേഖലാതല മത്സരങ്ങളുടെ സമ്മാനം, വിദ്യാഭ്യാസ സ്കോളർഷിപ്പ് വിതരണംഎന്നിവ കേന്ദ്ര വനിതാസംഘം വൈസ് പ്രസിഡന്റും യോഗം കൗൺസിലറുമായ ഇ.എസ്. ഷീബ ടീച്ചർ നിർവഹിക്കും.യൂണിയൻ സെക്രട്ടറി ഹരി വിജയൻ, വൈസ് പ്രസിഡന്റ് ഷൈജു മനയ്ക്കപ്പടി, യോഗം ഇൻസ്പെക്ടിംഗ് ഓഫീസർ ഡി. ബാബു, യോഗം ‌ഡയറക്ട‌‌ർമാരായ പി.എസ്. ജയരാജ്, എം.പി. ബിനു, തുടങ്ങിയവർ സംസാരിക്കും.