തൊടുപുഴ: മഹാത്മാഗാന്ധി സർവകലാശാല പുതിയതായി ആരംഭിക്കുന്ന സ്കൂളുകളെല്ലാം മുട്ടം ക്യാമ്പസിൽ പ്രവർത്തിപ്പിക്കാൻ തീരുമാനമായി. എം.ജി സർവ്വകലാശാലയുടെ കീഴിൽ വിവിധ സ്ഥലങ്ങളിലായി 14 ടീച്ചിംഗ് സ്കൂളുകൾ (ഡിഫ്‌റന്റ് സ്കൂൾസ് ) പ്രവർത്തിച്ചു വരുന്നുണ്ട്. ഇതിൽ പ്രധാനപ്പെട്ട ടീച്ചിംഗ് സ്കൂളുകളെല്ലാം തന്നെ അതിരമ്പുഴയിലെ സർവ്വകലാശാല ആസ്ഥാനത്താണ് പ്രവർത്തിച്ചുവരുന്നത്.

സ്കൂൾ ഒഫ് സോഷ്യൽ സയൻസ്,സ്കൂൾ ഒഫ് ഇന്ത്യൻ ലീഗ് തോട്ട്സ് എന്നിങ്ങനെയുള്ള ചില സ്ക്കൂളുകൾ സർവകലാശാല ആസ്ഥാനത്തിന് പുറത്തെ ക്യാമ്പസുകളിലും പ്രവർത്തിക്കുന്നുണ്ട്. തൊടുപുഴ-പുളിയൻമല സംസ്ഥാന പാതയോട് ചേർന്ന് സർവകലാശാലയുടെ മുട്ടം കാമ്പസിൽ 25 ഏക്കറോളം സ്ഥലം സ്വന്തമായിട്ടുണ്ട്. ഇതാണ് പുതിയ സ്കൂളുകൾ മുട്ടം കാമ്പസിൽ ആരംഭിക്കാൻ സർവകലാശാലയെ പ്രേരിപ്പിച്ചത്.

കോട്ടയം, എറണാകുളം, ഇടുക്കി, പത്തനംതിട്ട എന്നീ ജില്ലകൾ മുഴുവനായും ആലപ്പുഴ ജില്ലയുടെ ചില ഭാഗങ്ങളും ഉൾപ്പെടുന്നതാണ് എം.ജി. സർവകലാശാലയുടെ പ്രവർത്തന പരിധി. മുട്ടം കാമ്പസിൽ പുതിയ സ്കൂളുകൾ ആരംഭിക്കുന്നതിന്റെ മുന്നോടിയായി സ്കൂൾ ഒഫ് ടൂറിസം സ്റ്റഡീസിന്റെ കെട്ടിട നിർമ്മാണം ഉടൻ ആരംഭിക്കും.10 കോടി രൂപ ചെലവ് പ്രതീക്ഷിക്കുന്ന,​ രണ്ട് നിലകളിലായി 40,000 ചതുരശ്ര അടി വിസ്തീർണ്ണമുളള കെട്ടിടമാണ് നിർമ്മിക്കുന്നത്. ഇതിനായുള്ള പ്രാഥമിക ജോലികൾ ആരംഭിച്ചു കഴിഞ്ഞു. മാസ്റ്റർ ഒഫ് ടൂറിസം ആൻ‌ഡ് ട്രാവൽ മാനേജ്മെന്റ്, മാസ്റ്റർ ഒഫ് ട്രാൻസ്‌പോർട്ടേഷൻ ആൻ‌ഡ് ലോജിസ്റ്റിക്ക്സ്, മാസ്റ്റർ ഒഫ് ഹോട്ടൽ മാനേജ്‌മെന്റ് തുടങ്ങിയ കോഴ്‌സുകളാണ് സ്കൂൾ ഒഫ് ടൂറിസം സ്റ്റഡീസിന്റെ കീഴിൽ ഉൾപ്പെടുത്തിയിട്ടുള്ളത്.

മുട്ടം കാമ്പസിൽ ആരംഭിക്കുന്ന മറ്റു സ്കൂളുകൾ

സിനിമ,ടെലിവിഷൻ കോഴ്സുകൾക്കായുളള ഫിലിം ഇൻസ്റ്റിറ്റ്യൂട്ട്. ഡിപ്ലോമ, പി.ജി ഡിപ്ലോമ തുടങ്ങിയ ഹൃസ്വകാല കോഴ്‌സുകൾക്കുള്ള ഡയറക്ടറേറ്റ് ഫോർ അപ്ലൈഡ് ഷോർട്ട് ടൈം പ്രോഗ്രാംസിന്റെ പ്രാദേശിക കേന്ദ്രം. പി. എച്ച്. ഡി, എം.ഫിൽ പ്രോഗ്രാംസ്.