അടിമാലി : വിദ്യാർത്ഥികളെ ഗണിതം രസകരമായി പഠിപ്പിക്കുന്നതിന് അദ്ധ്യാപകർക്ക് സംഘടിപ്പിച്ച ദ്വിദിന പരിശീലന ശിൽപശാലക്ക് അടിമാലിയിൽ തുടക്കമായി. പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായാണ് പരിപാടി സംഘടിപ്പിച്ചത്. ഒന്നാം ക്ലാസിലെ കുട്ടികളിലാണ് പുതിയ രീതി ആദ്യഘട്ടത്തിൽ പരീക്ഷിക്കുന്നത്. സംഖ്യാപദം, ഗണിത വസ്തുകൾ തുടങ്ങിയവ രസകരമായും പഠനോപകരണങ്ങൾ മുഖേനയും പഠിപ്പിക്കുന്നതിനാണ് അദ്ധ്യാപകർക്ക് പരിശീലനം നൽകുന്നത്. ഉല്ലാസഗണിതം എന്ന പേരിൽ, സമഗ്ര ശിക്ഷ കേരളം, ബി ആർ സി അടിമാലി മേഖല എന്നിവ സംയുക്തമായാണ് പരിശീലന പരിപാടി സംഘടിപ്പിച്ചത്. അടിമാലി എസ് എൻ ഡി പി ബി എഡ് കോളേജ് ഓഡിറ്റോറിയത്തിൽ നടന്ന പരിശീലന പരിപാടിയുടെ ഉദ്ഘാടനം കോളേജ് പ്രിൻസിപ്പാൾ അനുപ സൂസൻ ചെറിയാൻ നിർവ്വഹിച്ചു. ബിപിഒ ഷാജി തോമസ് സ്വാഗതം പറഞ്ഞു, ഇടുക്കി ഡിപിഒ പികെ ഗംഗാധരൻ, എച്ച്എം ഫോറം പ്രതിനിധി എംഡി പ്രിൻസ്‌മോൻ തുടങ്ങിയവർ സംസാരിച്ചു. 50തോളം അദ്ധ്യാപകരാണ് പരിശീല പരിപാടിയിൽ പങ്കെടുക്കുന്നത്. ദ്വിദിന ശിൽപശാല ഇന്ന് സമാപിക്കും.