ആലക്കോട്: പഞ്ചായത്തിലെ പ്രധാന റോഡുകൾ കാലവർഷത്തിനു മുമ്പ് അറ്റകുറ്റപ്പണി നടത്താത്തത് മൂലം കുണ്ടും കുഴിയുമായി ഗതാഗതയോഗ്യമല്ലാതായി മാറിയിരിക്കുകയാണെന്ന് കേരള കോൺഗ്രസ് ജോസ് കെ. മാണി വിഭാഗം ആലക്കോട് മണ്ഡലം കമ്മിറ്റി കുറ്റപ്പെടുത്തി. പഞ്ചായത്തിലെ പ്രധാന റോഡുകളായ കലയന്താനി ചെലവ്, ആലക്കോട് ഇഞ്ചിയാനി, അഞ്ചിരി കാഞ്ഞാർ, വെള്ളാന്താനം ആർപ്പാമറ്റം, ചിലവ് ഓലിക്കാമറ്റം തുടങ്ങിയ വിവിധ ഗ്രാമീണ റോഡുകളുമാണ് തകർന്നുതരിപ്പണമായിരിക്കുന്നത്. സാധാരണ ഗതിയിൽ കാലവർഷത്തിന് മുമ്പേ റോഡുകളുടെ അറ്റകുറ്റപ്പണി പൊതുമരാമത്ത് പൂർത്തീകരിക്കാറുണ്ട്. ഈ വർഷം അതുണ്ടായില്ലെന്നു മാത്രമല്ല ഗ്രാമീണ റോഡുകളുടെ പുനരുദ്ധാരണത്തിന് ത്രിതല പഞ്ചായത്തുകളും വിവിധ സർക്കാർ ഏജൻസികളും കടുത്ത അവഗണനയാണ് പുലർത്തുന്നത്. മണ്ഡലം പ്രസിഡന്റ് തോമസ് വട്ടപ്പാറയുടെ അദ്ധ്യക്ഷതയിൽ ചേർന്ന യോഗം പാർട്ടി തൊടുപുഴ നിയോജകമണ്ഡലം പ്രസിഡന്റ് ജിമ്മി മറ്റത്തിപ്പാറ ഉദ്ഘാടനം ചെയ്തു. സ്റ്റിയറിംഗ് കമ്മിറ്റി അംഗം അഗസ്റ്റിൻ വട്ടക്കുന്നേൽ, മാത്യു വാരികാട്ട്, അപ്പച്ചൻ പാലാട്ട്, ജോസി വേളാച്ചേരി, സി.ജെ. ജോർജ് ചെരുവിൽ, റോയി കളപ്പുര, അപ്പച്ചൻ കിഴക്കേക്കര തുടങ്ങിയവർ പ്രസംഗിച്ചു.