വൈക്കം : ബഹിരാകാശ വിസ്മയത്തിൽ ലോകം ഉ​റ്റുനോക്കുന്ന രാഷ്ട്രമായി ഭാരതം മാറിയതായി ഗഗൻയാൻ ഡയറക്ടറും ബഹിരാകാശ ശാസ്ത്രജ്ഞനുമായ ഡോ.എസ് ഉണ്ണികൃഷ്ണൻ നായർ പറഞ്ഞു. വൈക്കം ശ്രീമഹാദേവ കോളേജിൽ ഐ.ടി ക്ലബിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം. 2022ൽ ഭാരതം മ​റ്റൊരു രാജ്യത്തിന്റെയും സഹായമില്ലാതെ മനുഷ്യനെ ബഹിരാകാശത്ത് എത്തിക്കുവാനുള്ള ശ്രദ്ധേയമായ പദ്ധതിയാണ് ഗഗൻയാൻ ദൗത്യം. ബഹിരാകാശ നിലയം സ്ഥാപിക്കാനുള്ള ഭാരതത്തിന്റെ ആദ്യപടിയായാണ് ഗഗൻയാൻ ദൗത്യമെന്ന് അദ്ദേഹം പറഞ്ഞു. കോളേജ് ഐ.ടി ക്ലബ്, ശ്രീ മഹാദേവ എഡ്യൂക്കേഷണൽ ആൻഡ് ചാരി​റ്റബിൾ സൊസൈ​റ്റി, ഓം ഫൗണ്ടേഷൻ, വൈക്കം മാനേജ്‌മെന്റ് അസോസിയേഷൻ എന്നിവയുടെ സംയുക്താഭിമുഖ്യത്തിൽ ഡോ.എസ്. ഉണ്ണികൃഷ്ണൻ നായർക്ക് സ്വീകരണം നൽകി. 'യുവർ ലൈഫ്, ഔവർ ഇൻസ്പിരേഷൻ' എന്ന പ്രഭാഷണ പരമ്പരക്ക് ഡോ.എസ്. ഉണ്ണികൃഷ്ണൻ നായർ തുടക്കം കുറിച്ചു. മാനേജിംഗ് കമ്മ​റ്റി ചെയർമാൻ ടി ആർ എസ് മേനോൻ അദ്ധ്യക്ഷത വഹിച്ചു. അഡ്വൈസറി ബോർഡ് അംഗം ഹരിവർമ്മ രാമവർമ്മ, നവകുമാരൻ നായർ, മാനേജർ ബി മായ ,വൈക്കം മാനേജ്‌മെന്റ് അസോസിയേഷൻ പ്രസിഡന്റ് രാജേന്ദ്രപ്രസാദ് , പ്രൊഫ: ലീനാ നായർ , കെ കെ ബേബി , പി ജി എം നായർ , അനൂപ് എം എ ,ആദർശ് എം നായർ, ഗീതു , ഹരികൃഷ്ണൻ പി ആർ എന്നിവർ പ്രസംഗിച്ചു. ബഹിരാകാശ രംഗത്തെ ഭാരതത്തിന്റെ വളർച്ചയുടെ വിവിധ ഘട്ടങ്ങൾ ഉൾക്കൊള്ളുന്ന പ്രദർശനവും നടന്നു.