കോട്ടയം: ഹാഷിഷ് ഓയിലുമായി പിടികൂടിയ ശേഷം എക്സൈസ് സംഘത്തെ വെട്ടിച്ച് രക്ഷപ്പെട്ട കേസിലെ പ്രതി ഒരുമാസത്തിന് ശേഷം പിടിയിൽ. മാടപ്പള്ളി വെട്ടിത്താനം ഷിജോ സെബാസ്റ്റ്യനെയാണ് എക്സൈസ് ഇൻസ്‌പെക്‌ടർ രാജേഷ് ജോണിന്റെ നേതൃത്വത്തിലുള്ള സംഘം പിടികൂടിയത്. 14 ഗ്രാം ഹാഷിഷ് ഓയിൽ കൈമാറുന്നതിനിടെ പിടികൂടാൻ എത്തിയ എക്‌സൈസിനെ വെട്ടിച്ച് ഷിജോ രക്ഷപ്പെടുകയായിരുന്നു. കഴിഞ്ഞ ദിവസം രാത്രി ഷിജോ മാമൂട് ഭാഗത്തുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ എക്സൈസ് സംഘം ഇവിടെ എത്തി. കനത്ത മഴയത്ത് സ്വകാര്യ കാറിൽ എക്സൈസ് സംഘം എത്തിയത് തിരിച്ചറിഞ്ഞ വീട്ടിൽ നിന്ന് ഇറങ്ങിയോടിയ പ്രതിയെ ഒരു കിലോമീറ്ററോളം ദൂരം പിൻതുടർന്ന് പിടികൂടുകയായിരുന്നു. ഷിജോ നിരവധി ക്രിമിനൽ മയക്ക് മരുന്ന് കേസുകളിൽ പ്രതിയാണ്. പ്രിവന്റീവ് ഓഫീസർമാരായ ബിനോയി കെ മാത്യു ,ശ്യീകുമാർ ,രാജീവ്, സിവിൽ എക്സൈസ് ഓഫീസർമാരായ ബ്ലസൺ ലൂയിസ് വിനോദ് എന്നിവർ ചേർന്നാണ് പ്രതിയെ പിടികൂടിയത്.