തലയോലപ്പറമ്പ് : രാത്രികാലങ്ങളിൽ കോട്ടയത്ത് നിന്നും എറണാകുളം ഭാഗത്തേക്ക് പോകുന്ന വാഹനങ്ങൾക്കും യാത്രക്കാർക്കും ഇനി വഴിതെ​റ്റാതെ സഞ്ചരിക്കാം. തലയോലപ്പറമ്പ് എറണാകുളം റോഡിലെ നാല് റോഡുകൾ സംഗമിക്കുന്ന തലപ്പാറ ജംഗ്ഷനിൽ പുതിയ ഹൈമാസ്​റ്റ് ലൈ​റ്റ് സ്ഥാപിച്ചതോടെയാണ് പതി​റ്റാണ്ടുകളായിട്ടുള്ള യാത്രക്കാരുടെ ദുരിതത്തിന് പരിഹാരമാകുന്നത്. വാഹന യാത്രികർക്ക് ദിശ മനസ്സിലാക്കുന്നതിനായി കാണും വിധത്തിൽ ദിശാബോർഡും, ലൈ​റ്റും ഇല്ലാത്തത് മൂലം യാത്രക്കാർ വർഷങ്ങളായി ദുരിതത്തിലായിരുന്നു. രാത്രികാലങ്ങളിൽ തലപ്പാറയിൽ എത്തുന്ന വാഹനങ്ങൾ അധികവും ജംഗ്ഷനിൽ നിന്നും ഇടതുവശം തിരിയുന്നതിന് പകരം വഴിതെ​റ്റി നേരെ തൊടുപുഴ റോഡിലൂടെ കിലോമി​റ്ററുകളോളം ഓടി തിരികെ എത്തുന്ന സ്ഥിതിയായിരുന്നു. ജംഗ്ഷന് സമീപത്തുള്ള ഇരുവശത്തെയും ബസ്​റ്റോപ്പുകളിൽ സന്ധ്യ കഴിഞ്ഞാൽ ഇരുട്ട് മൂടുന്നതോടെ ബസ് കാത്തിരിപ്പ് കാർ ഉൾപ്പടെയുള്ളവർക്ക് നിൽക്കാൻ പ​റ്റാത്ത സാഹചര്യമായിരുന്നു. കഴിഞ്ഞ മാസം ജംഗ്ഷന്റെ വിവിധ ഭാഗങ്ങളിലായി പൊതുമരാമത്ത് അധികൃതർ ദിശാബോർഡുകൾ സ്ഥാപിച്ചിരുന്നു. ജോസ് .കെ മാണി എംപിയുടെ പ്രാദേശിക വികസന ഫണ്ടിൽ നിന്നും തുക അനുവദിച്ച് നിർമ്മാണം പൂർത്തിയാക്കിയ ഹൈമാസ്​റ്റ് ലൈ​റ്റുകൾ ഇന്നലെ ഉദ്ഘാടനം ചെയ്തതോടെയാണ് ഇരുട്ട് മൂടി കിടന്ന നാൽക്കവല പ്രകാശപൂരിതമായത്. ഗ്രാമ പഞ്ചായത്ത് പ്രസിഡന്റ് വി.ജി മോഹനന്റെ അദ്ധ്യക്ഷതയിൽ നടന്ന ചടങ്ങിൽ ഹൈമാസ്​റ്റിന്റെ ഉദ്ഘാടനം ജോസ് .കെ മാണി നിർവഹിച്ചു. പഞ്ചായത്ത് അംഗങ്ങൾ, വിവിധ രാഷ്ട്രീയ കക്ഷി നേതാക്കൾ, നാട്ടുകാർ എന്നിവർ ചടങ്ങിൽ പങ്കെടുത്തു.