വൈക്കം: ടി വി പുരം ചെമ്മനത്ത് ശ്രീകൃഷണ സ്വാമി ക്ഷേത്രത്തിൽ നടക്കുന്ന 37ാമത് ശ്രീമദ് ഭാഗവത മഹാസത്രത്തിനു മുന്നോടിയായി നടത്തിയ നാരായണീയ പാരായണം ഭക്തി സാന്ദ്രമായി.108 ദിവസം നീളുന്ന പാരായണം സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള നാരായണീയ സമിതികളാണ് നിർവഹിക്കുന്നത്. ചെമ്മനത്ത് ശ്രീകൃഷ്ണസ്വാമി ക്ഷേത്ര മേൽശാന്തി പൊന്നുവള്ളി ഇല്ലത്ത് കൃഷ്ണൻ മൂത്തത് ഭദ്രദീപം കൊളുത്തിയാണ് നാരായണ പാരായണത്തിനു തുടക്കം കുറിച്ചത്. മരട് കൊച്ചി സങ്കീർത്തന നാരായണ പാരായണ സമിതിയാണ് ആദ്യ ദിവസം പാരായണം നടത്തിയത്. രാവിലെ ഒൻപതു മുതൽ വിഷ്ണു സഹസ്രനാമത്തോടെയാണ് നാരായണീയ പാരായണം ആരംഭിക്കുന്നത്. മേൽ പത്തൂർ നാരായണ ഭട്ടതിരിപ്പാടിനാൽ രചിക്കപ്പെട്ട നാരായണ പാരായണം പൂർത്തിയാകുമ്പോൾ നാടിനാകെ ശാന്തിയും ഐശ്വര്യവും സമൃദ്ധിയുമുണ്ടാകുമെന്നാണ് വിശ്വാസം. മികച്ച രീതിയിൽ നാരായണീയ പാരായണം നടത്തുന്ന മൂന്നു സമിതികൾക്ക് കേന്ദ്രസത്രസമിതി അവാർഡുകൾക്കായി തെരഞ്ഞെടുക്കും. ഡിസംബർ 12 മുതൽ 22വരെയാണ് ഭാഗവത മഹാസ്ത്രം നടക്കുന്നത്. നാരായണ പാരായണത്തിന് അഖില ഭാരത ശ്രീമദ് ഭാഗവത മഹാസത്ര നിർവഹണ സമിതി വർക്കിംഗ് ചെയർമാൻ ബി.അനിൽകുമാർ, ചീഫ് കോഓർഡിനേറ്റർ പി.വി.ബിനേഷ്, ജനറൽ കൺവീനർ രാഗേഷ് ടി.നായർ, നാരായണ പാരായണ കമ്മിറ്റി ചെയർപേഴ്‌സൺ ബീന അനിൽ, കൺവീനർ മായാരാജേന്ദ്രൻ തുടങ്ങിയവർ നേതൃത്വം നൽകി.നാളെ പള്ളിയറക്കാവ് നാരായണീയ പാരായണ സത്സംഘം മട്ടാഞ്ചേരിയാണ് പാരായണം നടത്തുന്നത്.