കോട്ടയം: ശബരിമലയിലെ ആചാരാനുഷ്ഠാന സംരക്ഷണത്തിന്റെ പ്രചരണാർത്ഥം ശബരിമല അയ്യപ്പ സേവാ സമാജത്തിന്റെ ആഭിമുഖ്യത്തിൽ നടത്തുന്ന അയ്യപ്പധർമ്മ പ്രചരണ രഥയാത്രയുടെ കോട്ടയം ജില്ലാതല സ്വാഗതസംഘം രൂപീകരിച്ചു.

തിരുനക്കര സ്വാമിയാർ മഠത്തിൽ നടന്ന യോഗം സ്വാമി ദർശനാനന്ദ സരസ്വതി ഉദ്ഘാടനം ചെയ്തു. ശബരിമല അയ്യപ്പസേവാസമാജം ജില്ലാ പ്രസിഡന്റ് പി. കേരളവർമ്മ അദ്ധ്യക്ഷത വഹിച്ചു. അയ്യപ്പസേവാ സമാജം ദേശീയ സംഘടനാ സെക്രട്ടറി വി.കെ.വിശ്വനാഥൻ, സംസ്ഥാന സെക്രട്ടറി മനോജ് എരുമേലി, ജില്ലാ സെക്രട്ടറി കൃഷ്ണൻകുട്ടി കുറുപ്പ്, ക്ഷേത്ര സംരക്ഷണ സമിതി സംസ്ഥാന വർക്കിംഗ് പ്രസിഡന്റ് കെ.എസ്.നാരായണൻ, മഹിളാ ഐക്യവേദി സംസ്ഥാന ജനറൽ സെക്രട്ടറി ബിന്ദു മോഹനൻ എന്നിവർ പ്രസംഗിച്ചു. ആചാര്യശ്രേഷ്ഠന്മാരും സന്യാസിവര്യന്മാരും രഥയാത്രയിൽ സംസാരിക്കും. സെപ്തംബർ 24ന് പന്തളത്തിന്നും ആരംഭിച്ച് ഒക്ടോബറിൽ ജില്ലയിൽ എത്തുന്ന രഥയാത്രയ്ക്ക് എല്ലാ പഞ്ചായത്ത് കേന്ദ്രങ്ങളിലും സ്വീകരണം നൽകും.

പരിപാടിയുടെ വിജയത്തിന് വേണ്ടി സ്വാമി ദർശനാനന്ദ സരസ്വതി, സ്വാമി സത്സ്വരൂപാനന്ദ സരസ്വതി, സ്വാമി ഗരുഡധ്വജാനന്ദ തീർത്ഥപാദർ (മുഖ്യ രക്ഷാധികാരികൾ), പ്രൊഫ.മാടവന ബാലകൃഷ്ണപിള്ള (ചെയർമാൻ) രാജേഷ് നട്ടാശേരി (ജനറൽ കൺവീനർ) ഡോ.എസ്.വി.പ്രദീപ് (ട്രഷറർ) എന്നിവർ ഭാരവാഹികളായി 108 അംഗ സ്വാഗത സംഘം തിരഞ്ഞെടുത്തു.