ന്യൂഡൽഹി: ബഹിരാകാശ സഞ്ചാരിയും ഇന്ത്യൻ വംശജയുമായ സുനിത വില്യംസ് ഇസ്ലാമിലേക്ക് മതം മാറിയെന്ന തരത്തിൽ വ്യാജ വാർത്തകൾ പ്രചരിച്ചിരുന്നു. ബംഗാളി ഭാഷയിൽ മക്ക മദീന എന്ന ഫേസ്ബുക്ക് പേജിലൂടെയായിരുന്നു സുനിത വില്യംസ് മതം മാറിയെന്ന വാർത്തകളും വീഡിയോയും പ്രചരിച്ചിരുന്നത്. ബംഗാളി ഭാഷയിൽ നിർമ്മിച്ച വീഡിയോ ഇതുവരെ രണ്ട് ലക്ഷത്തിലേറെ ആളുകൾ കാണുകയും 11,000ത്തിലെ പേർ ഷെയർ ചെയ്യുകയും ചെയ്തിട്ടുണ്ട്.

വീഡിയോയിൽ സുനിത ഇസ്ലാം മതത്തിൽ ചേർന്നെന്ന് പറയുന്നു. മാത്രമല്ല ബഹിരാകാശത്ത് വച്ച് ഇടതുവശത്തായി രണ്ട് നക്ഷത്രങ്ങൾ കണ്ടെന്നും ബൈനോക്കറിലൂടെ നോക്കുമ്പോൾ നക്ഷത്രത്തിലെ വെളിച്ചം മക്കയിൽ നിന്ന് ഉത്ഭവിക്കുന്നതാണെന്ന് മനസ്സിലായതിനെ തുടർന്ന് സുനിത ഇസ്ലാം മതത്തിൽ വിശ്വസിച്ചു തുടങ്ങിയെന്നുമാണ് വീഡിയോയിൽ പറയുന്നത്.

എന്നാൽ സുനിത വില്യംസ് മതം മാറിയിട്ടില്ലെന്ന് മനസിലായതായി ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു. മാത്രമല്ല ഇത് വർഷങ്ങളായി നടക്കുന്ന വ്യാജ പ്രചാരണമാണെന്നും റിപ്പോർട്ടിൽ വ്യക്തമാക്കുന്നു. 2010ലും സമാനമായ പ്രചാരണം നടന്നിരുന്നു. അടിസ്ഥാന രഹിതമായ വാർത്ത പ്രചരിക്കുന്നതെങ്ങനെയെന്ന് അറിയില്ലെന്നാണ് അന്ന് സുനിത വില്യംസ് പറഞ്ഞത്. എന്റെ അച്ഛൻ ഹിന്ദുവാണ്. അമ്മ ക്രിസ്ത്യാനിയും. ശ്രീരാമന്റെയും ശ്രീകൃഷ്ണന്റെയും യേശു ക്രിസ്തുവിന്റെയും കഥകൾ കേട്ടാണ് ഞാൻ വളര്‍ന്നത്. ഞാൻ ദൈവത്തിൽ വിശ്വസിക്കുന്നുവെന്നായിരുന്നും സുനിത വ്യക്തമാക്കിയിരുന്നു.