ന്യൂഡൽഹി: കേന്ദ്ര ധനമന്ത്രി നിർമ്മല സീതാരാമനെതിരെ രൂക്ഷ വിമർശനവുമായി കോൺഗ്രസ് നേതാവ് രാഹുൽ ഗാന്ധി. നിർമ്മല സീതാരാമനെ കഴിവില്ലാത്തവർ എന്നാണ് രാഹുൽ ഗാന്ധി വിശേഷിപ്പിച്ചത്. രാജ്യത്തെ സമ്പദ് വ്യവസ്ഥ മാന്ദ്യത്തിലേക്ക് നീങ്ങുന്നതായും അദ്ദേഹം താക്കീത് നൽകി.

എണ്ണയുമായി ബന്ധപ്പെട്ട മേഖലയിലെ എട്ട് പ്രധാന വ്യവസായങ്ങളുടെ വളർച്ച ജൂൺ മാസത്തിൽ 0.2 ശതമായി കുറഞ്ഞുവെന്ന് വ്യക്തമാക്കുന്ന ഔദ്യോഗിക കണക്കുകൾ പുറത്ത് വന്നതിന് തൊട്ടുപിന്നാലെയാണ് രാഹുലിന്റെ വിമർശനം. സമ്പദ് വ്യവസ്ഥയുമായി ബന്ധപ്പെട്ട ഒരു പത്രവാർത്ത ട്വീറ്റ് ചെയ്തുകൊണ്ടാണ് അദ്ദേഹം രംഗത്തെത്തിയത്.

'മിസ്റ്റർ മോദി, രാജ്യത്തിന്റെ സമ്പദ് വ്യവസ്ഥ പാളം തെറ്റിയതിനാൽ തുരങ്കത്തിന്റെ അവസാനത്തിൽ വെളിച്ചമില്ലെന്ന് തോന്നുന്നു. നിങ്ങളുടെ കഴിവില്ലാത്ത ധനമന്ത്രി വെളിച്ചമുണ്ടെന്ന് പറയുന്നുണ്ടെങ്കിൽ എന്നെ വിശ്വസിക്കൂ, ഇത് സാമ്പത്തിക മാന്ദ്യത്തിലേക്കുള്ള യാത്രയാണ്.' രാഹുൽ ഗാന്ധി ട്വീറ്റ് ചെയ്തു.

Mr PM, The economy has derailed and there seems to be no light at the end of the tunnel. If your incompetent FM is telling you there is light, trust me it’s the train of recession coming at full throttle.https://t.co/ewoVj5m27X

— Rahul Gandhi (@RahulGandhi) August 1, 2019