ഹൈദരാബാദ്: ഭാര്യയിൽ നിന്ന് കടം വാങ്ങിയ പണത്തിന് ലോട്ടറിയെടുത്ത കർഷകനെ തേടിയെത്തിയത് 28 കോടിയുടെ ഭാഗ്യം. ഹൈദരാബാദിലെ കർഷകനാണ് അബുദാബി ബിഗ് ടിക്കറ്റ് നറുക്കെടുപ്പിലൂടെ 28 കോടി രൂപയുടെ സമ്മാനം നേടിയത്. മുൻ പ്രവാസിയും കർഷകനുമായ വിലാസ് റിക്കാലെയെയാണ് ഭാഗ്യം തേടിയെത്തിയത്. നേരത്തെ ദുബായിൽ ഡ്രൈവറായി ജോലി ചെയ്തിരുന്ന വിലാസ് റിക്കാല പുതിയ ജോലി കിട്ടാത്തതിനാൽ ഒന്നരമാസം മുൻപ് നാട്ടിലേക്ക് മടങ്ങിയിരുന്നു. ഇതിനിടെ സുഹൃത്ത് വഴിയെടുത്ത ടിക്കറ്റിനാണ് കഴിഞ്ഞദിവസം 28 കോടി ലഭിച്ചത്.

ടിക്കറ്റ് വാങ്ങാൻ ഭാര്യയിൽ നിന്നാണ് വിലാസ് കടം വാങ്ങിയത്. ഭാര്യയുടെ കൈയിൽ നിന്ന് 20,000 രൂപ കടംവാങ്ങി അബുദാബിയിലെ സുഹൃത്ത് വഴി മൂന്നു ടിക്കറ്റുകളാണെടുത്തത്. ഇതിലൊന്നിനാണ് 28 കോടി രൂപ സമ്മാനം ലഭിച്ചത്. യു.എ.ഇയിൽ ജോലി ചെയ്തിരുന്ന സമയം ദുബായ് ഷോപ്പിംഗ് ഫെസ്റ്റിവൽ നറുക്കെടുപ്പിന്റേത് അടക്കം സ്ഥിരമായി ടിക്കറ്റുകൾ എടുത്തിരുന്നുവെന്ന് വിലാസ് റിക്കാല പറഞ്ഞു. എന്നാൽ അന്നൊന്നും ഭാഗ്യം തേടിയെത്തിയില്ല.

അതേസമയം, കഴിഞ്ഞദിവസം നടന്ന ബിഗ്ടിക്കറ്റ് നറുക്കെടുപ്പിൽ എട്ട് സമ്മാനങ്ങളിൽ പകുതിയും ഇന്ത്യക്കാർക്കാണ്. ശരത് തളിയിൽ ഉദയകൃഷ്ണൻ ( 90,000 ദിർഹം), സൗമ്യ തോമസ് ( 70,000 ദിർഹം), അലോക ഷെട്ടി ( 50,000), ഡാനിസ് ലസ്രാഡോ ( 20,000) എന്നിവരാണ് സമ്മാനം നേടിയ മറ്റ് ഇന്ത്യക്കാർ.

കഴിഞ്ഞ മാസത്തെ 12 ദശലക്ഷം ദിർഹത്തിന്റെ ബിഗ് ടിക്കറ്റ് സമ്മാനം നേടിയ മലയാളി സ്വപ്നാ നായർ ശനിയാഴ്ചത്തെ പുതിയ നറുക്കെടുപ്പിലെ വേദിയിലെത്തിയിരുന്നു.