ന്യൂയോർക്ക് : നായയെ വെടിവെച്ച പൊലീസുകാരന്റെ ഉന്നം തെറ്റി വെടിയുണ്ട തുളച്ചുകയറിയത് യുവതിയുടെ നേർക്ക്. വെടിയേറ്റ യുവതി തത്ക്ഷണം മരിച്ചു. അമേരിക്കയിലെ ആർലിങ്ടണിലാണ് സംഭവം.

പുൽത്തകിടിയിൽ ഒരു യുവതി ബോധരഹിതയായി കിടക്കുന്നു എന്ന വിവരത്തെതുടർന്നാണ് പൊലീസ് സ്ഥലത്തെത്തിയത്. എന്നാൽ സ്ത്രീയെ തേടിയുള്ള തിരച്ചിലിനിടയിൽ ഒരു നായ പൊലിസീന് നേർ‌ക്ക് കുരച്ചുകൊണ്ടു ചാടുകയായിരുന്നു. ഉടനെ പൊലീസ് ഉദ്യോഗസ്ഥൻ നായയുടെ നേരെ വെടിയുതിർക്കുകയായിരുന്നു. വെടിയുണ്ട ലക്ഷ്യംതെറ്റി യുവതിയുടെ നെഞ്ചിൽ തുളച്ചുകയറി. ഉടൻ സമീപത്തുള്ള ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

വെടിയേറ്റു മരിച്ച മുപ്പതുകാരിയായ മാർഗരീറ്റ വിക്ടോറിയ ആർലിങ്ടൻ ഫയർ ക്യാപ്റ്റന്റെ മകളാണെന്ന് പിന്നീടു പൊലീസ് വെളിപ്പെടുത്തി. കൊല്ലപ്പെട്ട യുവതിയുടേതായിരുന്നു നായ. ഇവർ ബോധരഹിതയായി കിടന്നത് ഏതു സാഹചര്യത്തിലാണെന്നു പൊലീസ് അന്വേഷിച്ചുവരുന്നു. വെടിവച്ച പൊലീസ് ഉദ്യോഗസ്ഥനെതിരെ നടപടിയെടുത്തിട്ടുണ്ട്.