ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് അമ്പിളി. സൗബിൻ ഷാഹിർ നായകനാകുന്ന ചിത്രത്തിന്റെ 'ജാക്‌സനല്ലെടാ' എന്ന ഗാനം സോഷ്യൽ മീഡിയയിൽ തരംഗം സൃഷ്‌ടിച്ചിരുന്നു. കഴിഞ്ഞ ദിവസം കൊച്ചി ലുലു മാളിൽ നടന്ന ചിത്രത്തിന്റെ ഓഡിയോ ലോഞ്ചും ഇപ്പോൾ ശ്രദ്ധേയമാവുകയാണ്. ചടങ്ങിൽ സൗബിൻ ഷാഹിർ, കുഞ്ചാക്കോ ബോബൻ, നസ്രിയ നസിം, നവീൻ നസിം, തൻവി റാം, ദിലീഷ് പോത്തൻ തുടങ്ങി നിരവധി താരങ്ങൾ പങ്കെടുത്തു.
ഇത്തവണ താൻ കുറച്ച് മാറ്റിയാണ് ചെയ്‌തിരിക്കുന്നതെന്നും, എല്ലാവരും ഇതിനെയും ഒന്ന് രക്ഷപ്പെടുത്തണമെന്ന സൗബിന്റെ വാക്കുകൾ ഹർഷാരവങ്ങളോടെയാണ് കാണികൾ സ്വീകരിച്ചത്.
തനിക്ക് ഏറ്റവും അസൂയയും ദേഷ്യവുമുളള ഐറ്റമാണ് സൗബിൻ. കഴിഞ്ഞ 22 വർഷമായി ഞാൻ സിനിമയിൽ വന്നിട്ട്. ഇദ്ദേഹം എത്തിയിട്ട് രണ്ട് വർഷമായി. സിനിമയിൽ പൊളിപൊളിക്കുകയാണ്. ഓഡിയോ ലോഞ്ചിന് ഞാൻ എത്തിയത് തന്നെ സൗബിന്റെ മൈക്കിൾ ജാക്സൺ ഡാൻസ് കാണാനാണ്.' എന്നായിരുന്നു കുഞ്ചാക്കോ ബോബന്റെ വാക്കുകൾ.
ഓഡിയോ ലോഞ്ചിനു ശേഷം ആരാധകർക്കായി അണിയറ പ്രവർത്തകർ സംഗീത വിരുന്നും ഒരുക്കിയിരുന്നു. ബെന്നി ദയാൽ, ആന്റണി ദാസൻ, സൂരജ് സന്തോഷ്, വിഷ്ണു വിജയ്, മധുവന്തി നാരായൺ എന്നിവർ പങ്കെടുത്തു.
ജോൺപോളാണ് അമ്പിളിയുടെ സംവിധായകൻ. ഗപ്പിയ്‌ക്ക് ശേഷം ജോൺ പോൾ ഒരുക്കുന്ന ചിത്രമാണിത്. സൗബിൻ ഷാഹിറാണ് അമ്പിളിയായി വേഷമിടുന്നത്. നാഷണൽ സൈക്കിളിംഗ് ചാമ്പ്യനായ ബോബി കുര്യൻ എന്ന കഥാപാത്രത്തെയാണ് നവീൻ നസിം അവതരിപ്പിക്കുന്നത്. പുതുമുഖം തൻവി റാം ആണ് ചിത്രത്തിലെ നായിക.