കൊച്ചി: കേരളത്തിൽ നിന്നുള്ള യു.ഡി.എഫ് എം.പിമാർ പാർലമെന്റിൽ ബി.ജെ.പിയുടെ ഘടകകക്ഷിയെപ്പോലെയാണ് പെരുമാറുന്നതെന്ന് മന്ത്രി എം.എം. മണിയുടെ വിമർശനം. ബി.ജെ.പിക്ക് ബദൽ എന്ന് അവകാശപ്പെട്ട് തിരഞ്ഞെടുപ്പ് ജയിച്ച യു.ഡി.എഫ് ഇപ്പോൾ ബി.ജെ.പിയുടെ വാലിൽ തൂങ്ങിനടക്കുകയാണ്. ഘടകകക്ഷിയെ പോലെ കരിനിയമങ്ങൾ പാസാക്കാൻ കോൺഗ്രസ് ബി.ജെ.പിയെ സഹായിക്കുകയാണ് എന്നും എം.എം. മണി ഫേസ്‌ബുക്ക് പോസ്റ്റിൽ കുറ്റപ്പെടുത്തി.

ഫേസ്ബുക്ക് പോസ്റ്റിന്റെ പൂർണ രൂപം

പാർലമെന്റിൽ ബി.ജെ.പി.യുടെ ഘടക കക്ഷിയെപ്പോലെ ഒരുമിച്ചുനിന്ന് കരിനിയമങ്ങൾ പാസാക്കാൻ കൈ ഉയർത്തിയ യു.ഡി.എഫ്. എം.പി.മാർ കേരളത്തിലെ ജനങ്ങളോട് പറയുന്നത് കേട്ടില്ലേ? അത് പാസാക്കിയതിലുള്ള എതിർപ്പ് കോൺഗ്രസിന്റെ കേന്ദ്ര നേതൃത്വത്തെ അറിയിക്കുമെന്ന് ! ഹൊ, വലിയ കാര്യം തന്നെ ! ഇവരെപ്പറ്റി എന്ത് പറയാനാ? കൂടെ നിന്ന് എല്ലാം പാസാക്കിക്കൊടുത്തു. ഇനി നേതൃത്വത്തെ അറിയിച്ചുകളയും പോലും. കോൺഗ്രസ് നേതൃത്വം ഇടപെട്ട് പാസാക്കിയതെല്ലാം ഇപ്പോൾ റദ്ദാക്കിക്കളയുമെന്ന് ചെന്നിത്തലയും, മുല്ലപ്പള്ളിയും കൂട്ടരും കരുതിയോ എന്തോ?

'ബി.ജെ.പിക്ക് ബദൽ ഞങ്ങൾ' എന്ന് വീമ്പിളക്കി ജനങ്ങളെ കബളിപ്പിച്ച് 19 പേരെ ജയിപ്പിച്ചെടുത്ത വീരഗാഥകൾ പാടിപ്പാടി നടക്കുന്ന യു.ഡി.എഫ്. ഇപ്പോൾ ബി.ജെ.പി.യുടെ വാലിൽ തൂങ്ങി നടക്കുന്ന കാഴ്ചയാണ്. ജനങ്ങളെ കബളിപ്പിക്കുന്നതിന് ഇവർക്ക് യാതൊരു നാണക്കേടുമില്ല. ഇവർ ജനങ്ങളുടെ കണ്ണിൽ പൊടിയിടുകയാണ്.