കൊച്ചി: ആഭരണ പ്രേമികളെ ആശങ്കപ്പെടുത്തി സംസ്ഥാനത്ത് സ്വർണവില ഇന്നലെ പുതിയ ഉയരം കുറിച്ചു. ഗ്രാമിന് 25 രൂപ വർദ്ധിച്ച് 3,​350 രൂപയിലും 200

ഉയർന്ന് 26,​800 രൂപയിലും ആയിരുന്നു ഇന്നലെ വ്യാപാരം. ആഗസ്‌റ്റ് അഞ്ചിന് കുറിച്ച റെക്കാഡാണ് (ഗ്രാമിന് 3,​325 രൂപ; പവന് 26,600 രൂപ)​ പഴങ്കഥയായത്.

വില കുതിച്ചുയരുന്നതിനാൽ സംസ്ഥാനത്ത് വില്‌പന മന്ദഗതിയിലാണ്. പ്രതിദിന വില്‌പന 50 ശതമാനം വരെ കുറഞ്ഞുവെന്ന് വ്യാപാരികൾ പറയുന്നു. ഈമാസം ഇതുവരെ പവന് 1,​120 രൂപയും ഗ്രാമിന് 140 രൂപയുമാണ് കൂടിയത്. രണ്ടുദിവിസത്തിനിടെ മാത്രം ഗ്രാമിന് 75 രൂപയും പവന് 600 രൂപയും ഉയർന്നു. 2019ൽ ഇതുവരെ 3,​360 രൂപയുടെ കുതിപ്പ് പവൻവില നടത്തി. ഗ്രാമിന് 420 രൂപയും വർദ്ധിച്ചു.

മുന്നേറ്റത്തിന്

പിന്നിൽ

 അമേരിക്ക-ചൈന വ്യാപാരയുദ്ധം,​ പശ്‌ചിമേഷ്യയിലെ സംഘർഷാവസ്ഥ എന്നിവമൂലം ആഗോള നിക്ഷേപകർ ഓഹരി വിപണിയിൽ നിന്ന് പിൻവലിയുന്നു

 സുരക്ഷിത നിക്ഷേപമെന്ന നിലയിൽ സ്വർണത്തിന് വൻ ഡിമാൻഡ്

 ഡോളറിനെതിരെ രൂപയുടെ മൂല്യത്തകർച്ച മൂലം ഇറക്കുമതി ചെലവേറി

$1,467

ഡിമാൻഡ് കൂടിയതോടെ,​ അന്താരാഷ്‌ട്ര സ്വർണവില ഔൺസിന് ആറുവർഷത്തെ ഉയരമായ 1,​467 ഡോളറിലെത്തി. ഇതാണ്,​ ഇന്ത്യയിലും പ്രതിഫലിക്കുന്നത്.

₹1,​120

ഈമാസം ഇതുവരെ പവൻ വിലയിലുണ്ടായ വർദ്ധന 1,​120 രൂപയാണ്. ഗ്രാമിന് കൂടിയത് 140 രൂപ.

വിപണി വില

ഇന്നലെ പവൻ വില 26,​800 രൂപ. എന്നാൽ,​ നികുതിയും പണിക്കൂലിയും ചേരുമ്പോൾ ഒരുപവൻ വാങ്ങാൻ കുറഞ്ഞത് 28,​000 രൂപയെങ്കിലും നൽകേണ്ടി വരും.

വില എങ്ങോട്ട്?​

നിലവിലെ ട്രെൻഡ് തുടരുമെന്നും ഈവാരം തന്നെ പവൻ വില 27,​000 രൂപ കടക്കുമെന്നുമാണ് വിപണിയുടെ വിലയിരുത്തൽ.