കനത്ത മഴയിൽ കുത്തിയൊലിച്ചെത്തുന്ന വെള്ളം പലപ്പോഴും വീടിന്റെ അടിത്തറ വരെ ഇളക്കും. അതിനാൽ മഴക്കാലത്ത് മഴവെള്ളം വീടിന്റെ തറഭാഗത്തേക്ക് താഴ്ന്നിറങ്ങാതെ ശ്രദ്ധിയ്ക്കണം. ഒരു വീടിന്റെ ഫൗണ്ടേഷൻ അനുസരിച്ചിരിക്കും അതിന്റെ നിലനിൽപ്. അതിനാൽ വീടിന്റെ നിർ‌മ്മാണ വേളയിൽതന്നെ ബലമുള്ള ഫൗണ്ടേഷൻ നി‌ർമ്മിക്കാൻ ശ്രദ്ധിക്കണം.
വീടിലെ ചുമരുകളിലും കോർണറുകളിലും ഈർപ്പം അനുഭവപ്പെടുന്നുണ്ടോ എന്നും മുറികളിൽ ഒരു ചെളിമണം വരുന്നുണ്ടോ എന്നും പരിശോധിക്കുക. ഇത് വെള്ളം ചുമരുകളിലേക്ക് ഇറങ്ങുന്നതിന്റെ തെളിവാണ്.ഇത്തരത്തിൽ ഈർപ്പം ഇറങ്ങുന്നത് വീട്ടിലെ വയറിംഗ് ഉൾപ്പടെയുള്ളതിനെ ബാധിക്കും. ടെറസിലെ വെള്ളം വീട്ടില്‍ നിന്നും അഞ്ചടിയെങ്കിലും മാറിയാണ് പതിക്കുന്നതെന്ന് ഉറപ്പുവരുത്തുക, ഇല്ലെങ്കില്‍ വീടിനു ചുറ്റും വെള്ളക്കെട്ട് രൂപപ്പെട്ട് ഇത് തറയുടെ ബലക്ഷയത്തിന് കാരണമാകും. ട്രസ്സ് വർക്ക് ചെയ്യാത്ത ടെറസിൽ തറയോട് വിരിച്ചാൽ മഴക്കാലത്ത് വീടിനകത്ത് വെള്ളം കടക്കില്ല.
ടെറസിലെ വെള്ളം പുറത്ത് കളയുന്ന പൈപ്പുകള്‍ കാര്യക്ഷമമെന്നു ഉറപ്പു വരുത്തുക. വെള്ളം പുറത്ത് പോകാതെ വന്ന് കെട്ടി കിടന്നാൽ ഈർപ്പം ചുമരുകളിൽ വ്യാപിച്ച് നാശനഷ്ടങ്ങൾ ഉണ്ടാകും.വീടിന്റെ ചുമരിൽ അങ്ങിങ്ങായി കാണുന്ന വിള്ളലുകൾ മഴവെള്ളം വീടിനകത്തു കടക്കാൻ ഇത് കാരണമാകും. ഇങ്ങനെ മഴവെള്ളം ചുവരിലേക്ക് ഇറങ്ങുന്നത് വീടിന് ബലക്ഷയം സംഭവിക്കാന്‍ കാരണമാകും.
ഏറ്റവും പ്രധാനപ്പെട്ട ഒന്നാണ് വീട്ടിലെ പെയിന്റുകൾ. മഴ മാത്രമല്ല വെയിലും സാരമായി ബാധിക്കുന്നതാണ് പെയിന്റിംഗ്. മഴയെയും വെയിലിനെയും പ്രതിരോധിക്കാൻ കഴിയുന്ന പെയിന്റുകൾ വിപണിയിൽ ലഭ്യമാണ്. പുറത്തെ ചുമരുകളിൽ കുമിളകളോ, പെയിന്റ് സാരമായി ഇളകി കിടക്കുന്നതോ, പൊട്ടലുകളോ കണ്ണിൽ പെട്ടാൽ ഉടൻ തന്നെ വേണ്ട ടച്ച് അപ് ചെയ്യുക.