വിപണിയിൽ എത്തുംമുമ്പേ തന്നെ താരപദവി സ്വന്തമാക്കിയിരിക്കുകയാണ് കിയ സെൽറ്രോസ്. ദക്ഷിണ കൊറിയൻ ബ്രാൻഡായ കിയയുടെ ഇന്ത്യയിലെ ആദ്യ മോഡലാണിത്. ഇന്ത്യയിൽ തന്നെയാണ് നിർമ്മാണം. ബി.എസ്-6 എൻജിനുകളാണുള്ളതെന്ന മികവുമുണ്ട്. സ്‌റ്റൈലിഷ് ആണെന്നതും പെർഫോമൻസിനും ടെക്‌നോളജിക്കും മുൻഗണന ഉണ്ടെന്നതുമാണ് വിറ്റഴിക്കപ്പെടും മുമ്പേ താരപദവിയിലേക്ക് സെൽറ്റോസിനെ ഉയർത്തിയത്.
ഈമാസം അവസാനത്തോടെ സെൽറ്റോസ് വിപണിയിലെത്തും. എന്നാൽ, നേരത്തേ ആരംഭിച്ച ബുക്കിംഗിലൂടെ ഇതുവരെ വണ്ടിവാങ്ങാൻ രജിസ്‌റ്റർ ചെയ്‌തത് 23,000ലേറെ പേർ. പ്രതിദിനം കുറിക്കുന്നത് ശരാശരി ആയിരം ബുക്കിംഗ്. കഴിഞ്ഞമാസം അവസാനവാരമായിരുന്നു ബുക്കിംഗിന്റെ തുടക്കം. വില ഇനിയും കമ്പനി വെളിപ്പെടുത്തിയിട്ടില്ല എന്നതാണ് ഏറെ രസകരം. എങ്കിലും, ബുക്കിംഗ് തകൃതിയാണ്.
അനുദിനം വളരുന്ന എസ്.യു.വി ശ്രേണിയിലേക്കാണ് സെൽറ്റോസിലൂടെ കിയ ഇന്ത്യയിൽ ചുവടുവയ്ക്കുന്നത്. ഇന്ത്യയിൽ ആദ്യമായാണ് കിയ എത്തുന്നത്. എന്നിട്ടും, ഇത്ര മികച്ച ബുക്കിംഗ് മുൻകൂറായി എങ്ങനെ നേടിയെന്നതിന് കമ്പനിക്കൊരു ഉത്തരമുണ്ട്; ബ്രാൻഡിനെ കുറിച്ചുള്ള ബോദ്ധ്യവും ഇന്ത്യക്കാരുടെ വിദ്യാസമ്പത്തും. ആകർഷകമായ ഡിസൈൻ, മികച്ച നിർമ്മാണ നിലവാരം, ഉന്നത ഫീച്ചറുകൾ എന്നിവയാണ് കിയ സെൽറ്റോസിന്റെ പ്ളസ് പോയിന്റുകൾ.
കിയയുടെ ഡിസൈൻ സിഗ്‌നേച്ചറോട് കൂടിയ, പുലിയുടെ മൂക്കിനെ അനുസ്‌മരിപ്പിക്കുന്ന ഗ്രിൽ സെൽറ്റോസിന് സ്‌പോർട്ടീ ഭാവം നൽകുന്നുണ്ട്. വലിയ ബോണറ്ര്, വ്യത്യസ്‌തമായ എൽ.ഇ.ഡി ഹെഡ്‌ലാമ്പ്, ഐസ് ക്യൂബുകൾ പോലെ തോന്നിക്കുന്ന ഫോഗ്‌ലാമ്പുകൾ, എൽ.ഇ.ഡി ഡേടൈം റണ്ണിംഗ് ലൈറ്റുകൾ (ഡി.ആർ.എൽ) എന്നിവ പ്രീമിയം ലുക്കും വാഹനത്തിന് സമ്മാനിക്കുന്നു. ടെക്‌ലൈൻ, ജി.ടി ലൈൻ എന്നിങ്ങനെ രണ്ടു പതിപ്പുകളാണ് സെൽറ്രോസിനുള്ളത്. ഹൈ-എൻഡ് മോഡലാണ് ടെക്‌ലൈൻ. ജി.ടി.ലൈനിൽ സ്‌പോർട്ടീ ഫീച്ചറുകൾക്കാണ് പ്രാമുഖ്യം.
ഓരോ പതിപ്പിനും എൻജിന്റെ പ്രത്യേകതയനുസരിച്ച് മൂന്ന് വേരിയന്റുകൾ വീതമുണ്ടാകും. മാനുവൽ, ഓട്ടോ ട്രാൻസ്‌മിഷൻ വിഭാഗങ്ങളിലായി നാല് വ്യത്യസ്‌ത മോഡലുകളിലും സെൽറ്രോസെത്തും. പിൻലൈറ്റും എൽ.ഇ.ഡിയാൽ സമ്പന്നമാണ്. ഡേടൈമിലും രാത്രിയിലും വ്യത്യസ്‌ത കാഴ്‌ച സമ്മാനിക്കുന്ന രൂപകല്‌പനയാണ് ഇവയ്ക്ക് നൽകിയിരിക്കുന്നത്. ടെയ്‌ൽ ഗേറ്റുവഴി വേർപിരിക്കപ്പെട്ടിരിക്കുന്ന ടെയ്‌ൽലൈറ്രിനോട് ചേർന്ന്, കിയ ലോഗോയോട് കൂടിയ ക്രോം ബാർ കാണാം. ഡ്യുവൽ എക്‌സ്‌ഹോസ്‌റ്ര്, അലുമിനിയം സ്‌കിഡ് പ്ളേറ്റ് എന്നിവ മികച്ച രീതിയിൽ സജ്ജീകരിച്ചിരിക്കുന്നു. ഇത്, സ്‌പോർട്ടീ ലുക്ക് കൂട്ടുന്നുമുണ്ട്.
വിശാലവും യൂറോപ്പ്യൻ മാതൃകയുള്ളതുമാണ് അകത്തളം. ശ്രേണിയിലെ തന്നെ ഏറ്റവും ഉയർന്ന ലെഗ്-ഹെഡ് റൂമുകളാണ് സെൽറ്റോസ് അവകാശപ്പെടുന്നത്. 10.25 ഇൻഫോടെയ്‌ൻമെന്റ് സ്‌ക്രീനും ഏഴിഞ്ച് ഡിജിറ്റൽ കളർ ഇൻസ്‌ട്രുമെന്റ് ക്ളസ്‌റ്ററുമാണ് അകത്തളത്തിൽ ആദ്യം കാഴ്‌ചയിൽ പതിയുന്ന പ്രധാന ഘടകങ്ങൾ. സീറ്റുകൾ മികവേറിയ ലെതറിൽ തീർത്തിരിക്കുന്നു. ഡാർക്ക്-ഗ്രേ നിറക്കൂട്ടാണ് അകത്തളത്തിൽ ചാലിച്ചിരിക്കുന്നത്. മൾട്ടി - ഫംഗ്‌ഷൻ സ്‌‌റ്റിയറിംഗ് വീൽ ക്ളാസിക് ടച്ചോടെ ഒരുക്കിയിരിക്കുന്നു. പിൻസീറ്ര് ബാക്ക്‌റെസ്‌റ്റും ക്രമീകരിക്കാവുന്ന സംവിധാനമുണ്ടെന്നത് മികവാണ്.
1.5 ലിറ്റർ പെട്രോൾ, 1.5 ലിറ്റർ വി.ജി.ടി ഡീസൽ, 1.4 ലിറ്റർ ടർബോ ചാർജ്ഡ് ജി.ഡി.ഐ പെട്രോൾ എന്നിങ്ങനെ മൂന്ന് എൻജിൻ ഓപ്‌ഷനുകളാണ് സെൽറ്റോസിനുള്ളത്. മൂന്നു എൻജിനുകളും ബി.എസ്-6 ചട്ടങ്ങൾ പാലിക്കുന്നവയാണ്. 6-സ്‌പീഡ് മാനുവൽ, ഓട്ടോ ട്രാൻസ്‌മിഷൻ സംവിധാനമാണ് ഓരോ പതിപ്പിനുമുള്ളത്. ഇതിൽ 1.4 ലിറ്റർ എൻജിന് 7-സ്‌പീഡ് ഡ്യുവൽ ക്ളച്ച് ട്രാൻസ്‌മിഷൻ പതിപ്പുമുണ്ട്. 140 പി.എസ് കരുത്തും 242 ന്യൂട്ടൺ മീറ്റർ ടോർക്കും അവകാശപ്പെടുന്ന എൻജിനാണിത്. ലിറ്രറിന് 16.1 മുതൽ 16.8 കിലോമീറ്റർ വരെ മൈലേജാണ് പെട്രോൾ എൻജിൻ പതിപ്പുകൾ വാഗ്‌ദാനം ചെയ്യുന്നത്. ഡീസൽ എൻജിൻ പതിപ്പ് ലിറ്ററിന് 21 കിലോമീറ്ററും മൈലേജ് അവകാശപ്പെടുന്നു.
മാതൃ ബ്രാൻഡായ ഹ്യുണ്ടായിയുടെ ജനപ്രിയമായ ക്രെറ്റയോട് ഏറെ അടുത്തു നിൽക്കുന്നതാണ് സെൽറ്റോസിന്റെയും രൂപകല്‌പന. ക്രെറ്രയോടാണ് സെൽറ്റോസിന്റെ പ്രധാന പോരാട്ടമെന്നതും കൗതുകമാണ്. 9.99 ലക്ഷം രൂപ മുതൽ 14.99 ലക്ഷം രൂപവരെയാണ് സെൽറ്റോസിന് പ്രതീക്ഷിക്കുന്ന എക്‌സ്‌ഷോറൂം വില.