പ്രളയത്തിൽപ്പെട്ട് കിടക്കുന്ന കേരളത്തിന് വേണ്ടി ഒന്നും ചെയ്തില്ലയെന്ന് ചലച്ചിത്ര താരം നിത്യ മേനനെതിരെ സോഷ്യൽ മീഡിയയിൽ വിമർശനമുണ്ടായിരുന്നു. നിത്യയുടെ ആദ്യ ബോളിവുഡ് ചിത്രമായ മിഷൻ മംഗൾ ഈ മാസം 15ന് തീയേറ്ററുകളിലെത്തുകയാണ്. സിനിമയുടെ പ്രമോഷന്റെ ഭാഗമായി ഫേസ്ബുക്കിൽ പോസ്റ്റ് ചെയ്ത ചിത്രങ്ങൾക്ക് താഴെ വിമർശനവുമായി നിരവധിപേരെത്തിയിരുന്നു. ഇതിന് പ്രതികരണവുമായി ഫേസ്ബുക്ക് വീഡിയോയിലൂടെ രംഗത്തെത്തിയിരിക്കുകയാണ് താരം.

പ്രളയവുമായി ബന്ധപ്പെട്ടുള്ള കാര്യങ്ങൾ ഫേസ്ബുക്കിൽ പോസ്റ്റ് ചെയ്യുന്നില്ലെന്ന് കരുതി ഒന്നും ചെയ്യുന്നില്ലെന്ന് അനുമാനിക്കരുതെന്നും ചെയ്യുന്ന എല്ലാ കാര്യങ്ങളും താൻ ഫേസ്ബുക്കിൽ പോസ്റ്റ് ചെയ്യാറില്ലെന്നും, പബ്ലിസിറ്റിക്ക് വേണ്ടിയാണ് നിങ്ങളൊരാളെ സഹായിക്കുന്നതെങ്കിൽ അതിൽ അർഥമില്ലെന്നും താരം പറയുന്നു.

മറ്റുള്ളവരെ വിമർശിക്കുന്നതിന് മുമ്പ് സ്വയം ചോദിക്കൂ,അതിന് സത്യസന്ധമായി മറുപടി നൽകിയാൽ ചിലപ്പോൾ നിങ്ങൾക്ക് മറ്റുള്ളവരുടെ നേരെ വിരൽ ചൂണ്ടാൻ കഴിയില്ലെന്നും പ്രമോഷൻ എന്ന് പറയുന്നത് തന്റെ ജോലിയുടെ ഭാഗമാണെന്നും നിത്യ ഫേസ്ബുക്ക് വീഡിയോയിൽ പറഞ്ഞു.

അക്ഷയ് കുമാർ, സോനാക്ഷി സിൻഹ, തപ്‌സി പന്നു, വിദ്യാ ബാലൻ, എന്നിവരോടൊപ്പമാണ് 'മിഷൻ മംഗൾ' എന്ന ചിത്രത്തിലൂടെ നിത്യ ബോളിവുഡിലേക്ക് കടക്കുന്നത്. ചിത്രത്തിൽ വളരെ പ്രധാനപ്പെട്ട വേഷമാണ് നിത്യക്ക് എന്നാണ് ലഭിക്കുന്ന വിവരം.