കൊച്ചി: സംസ്‌ഥാനത്ത് സ്വർണവില ഇന്നലെ പുതിയ ഉയരത്തിലേക്ക് കുതിച്ചുകയറി. അന്താരാഷ്‌ട്ര വില ഔൺസിന് ആറുവർഷത്തെ ഉയരമായ 1,​505 ഡോളറിലേക്ക് ഉയർന്നതും ഡോളറിനെതിരെ രൂപയുടെ മൂല്യത്തകർച്ച മൂലം ഇറക്കുമതി ചെലവ് വർദ്ധിച്ചതുമാണ് സ്വർണവിലയുടെ റെക്കാഡ് കുതിപ്പിന് കാരണം.

പവന് 320 രൂപ വർദ്ധിച്ച് ഇന്നലെ 27,​800 രൂപയായി. ഗ്രാമിന് 40 രൂപ ഉയർന്ന് വില 3,​475 രൂപയായി. ചരിത്രത്തിലെ ഏറ്റവും ഉയർന്ന വിലയാണിത്. ജി.എസ്.ടിയും പണിക്കൂലിയും പ്രളയ സെസും ചേരുമ്പോൾ ഒരുപവൻ വാങ്ങാൻ കുറഞ്ഞത് 31,​000 രൂപ നൽകേണ്ട സ്ഥിതിയാണ് ഇപ്പോഴുള്ളത്. ഈമാസം മാത്രം ഇതുവരെ ഗ്രാം വിലയിൽ 265 രൂപയും പവന് 2,​120 രൂപയുമാണ് കൂടിയത്. 2019ൽ ഇതുവരെ പവന് 4,​360 രൂപ വർദ്ധിച്ചു. ഗ്രാമിന് 545 രൂപയും ഉയർന്നു.