ന്യൂഡൽഹി: റിസർവ് ബാങ്ക് മുഖ്യ പലിശനിരക്കുകൾ പരിഷ്‌കരിക്കാൻ പ്രധാന മാനദണ്ഡമാക്കുന്ന ഉപഭോക്തൃവില സൂചിക അടിസ്ഥാനമാക്കിയുള്ള (റീട്ടെയിൽ)​ നാണയപ്പെരുപ്പം ജൂലായിൽ 3.15 ശതമാനമായി കുറഞ്ഞു. റിസർവ് ബാങ്കിന്റെ അടുത്ത ധനനയ നിർണയ യോഗത്തിലും പലിശനിരക്കുകൾ കുറയ്‌ക്കാൻ അനുകൂലമായ ഘടകമാണിത്. ജൂണിൽ 3.18 ശതമാനമായിരുന്നു നാണയപ്പെരുപ്പം. ഇത്,​ നാല് ശതമാനത്തിൽ താഴെ തുടരുന്നത് ആശ്വാസകരമാണ് എന്നാണ് റിസർവ് ബാങ്കിന്റെ നിലപാട്.

എന്നാൽ,​ ഭക്ഷ്യവിലപ്പെരുപ്പം കൂടുന്നത് ആശങ്ക സൃഷ്‌ടിക്കുന്നുണ്ട്. ജൂണിലെ 2.25 ശതമാനത്തിൽ നിന്ന് 2.36 ശതമാനമായാണ് ജൂലായിൽ ഭക്ഷ്യവിലപ്പെരുപ്പം ഉയർന്നത്. പച്ചക്കറി വിലനിലവാരം 4.66 ശതമാനത്തിൽ നിന്ന് 2.82 ശതമാനത്തിലേക്ക് താഴ്‌ന്നു. ധാന്യവില 5.68 ശതമാനത്തിൽ നിന്ന് 6.82 ശതമാനമായി വർദ്ധിച്ചു. പഴവർഗങ്ങൾ,​ ഇന്ധനം,​ മത്സ്യം,​ മാംസം എന്നിവയുടെ വിലനിലവാരം കുറഞ്ഞു.