കൊച്ചി: ദെെവത്തിന്റെ സ്വന്തം നാട് എന്ന വിശേഷണം അന്വർത്വമാക്കുന്ന ദുരിതാശ്വാസ പ്രവർത്തനങ്ങളാണ് കേരളത്തിലുടനീളം നടന്നുകൊണ്ടിരിക്കുന്നത്. മുഖ്യമന്ത്രിയുടെ ദുരിതാശ്വാസ നിധിയിലേക്ക് ലോകത്തിന്റെ വിവിധ കോണുകളിൽ നിന്നും ധനസഹായം പ്രവഹിക്കുകയാണ്. അതേസമയം തന്റെ ചലച്ചിത്ര താരം ശരണ്യ തന്റെ ചികിത്സയ്ക്കായി സ്വരൂക്കൂട്ടിവെച്ച തുകയിൽ നിന്ന് പതിനായിരം രൂപയാണ് മുഖ്യമന്ത്രിയുടെ പ്രളയ ദുരിതാശ്വാസ നിധിയിലേക്ക് നൽകിയത്.

ചികിത്സയ്ക്കായി മുഖ്യമന്ത്രിയുടെ ദുരിതാശ്വാസ നിധിയിൽ നിന്നും അനുവദിച്ച തുകയിൽനിന്നും ഒരു പങ്കാണ് താരം ദുരിതമനുഭവിക്കുന്നവർക്കായി അവർ തിരിച്ചുനൽകിയത്. സ്വാതന്ത്ര്യ ദിനത്തിൽ മുഖ്യമന്ത്രിയുടെ ദുരിതാശ്വാസനിധിയിലേക്ക് ഒരു പങ്കു നൽകാനായതിൽ തനിക്ക് സന്തോഷമുണ്ടെന്നും തനിക്ക് ലഭിച്ച തുകയിൽ നിന്നും ഒരു പങ്ക് തിരിച്ചുനൽകുകയാണെന്നും ശരണ്യ ഫേസ്ബുക്കിൽ കുറിച്ചു.

ഇക്കഴിഞ്ഞ ജൂണിലാണ് ശരണ്യയ്ക്ക് ട്യൂമർ ബാധയെ തുടർന്ന് ശസ്ത്രക്രിയ നടത്തേണ്ടി വന്നത്. ചികിത്സയ്ക്ക് സാമ്പത്തിക ബുദ്ധിമുട്ട് നേരിട്ട സാഹചര്യത്തിൽ സഹായിക്കണമെന്ന് അഭ്യർഥിച്ച് സീരിയൽ താരം സീമ.ജി.നായരും ഫിറോസ് കുന്നംപറമ്പിലും രംഗത്തെത്തിയിരുന്നു. തുടർന്ന് ശരണ്യയ്ക്ക് ചികിത്സയ്ക്കായുള്ള തുക ലഭിക്കുകയും ചെയ്തു. ശസ്ത്രക്രിയയ്ക്ക് വിധേയയായ ശരണ്യ ഇപ്പോൾ സുഖം പ്രാപിച്ചു വരികയാണ്.