കൊച്ചി: ആഭരണ പ്രേമികളെ നിരാശയിലാഴ്‌ത്തി സംസ്‌ഥാനത്ത് സ്വർണവില റെക്കാഡ് തകർത്ത് കുതിക്കുന്നു. ഇന്നലെ പവന് 28,000 രൂപയിലും ഗ്രാമിന് 3,500 രൂപയിലുമായിരുന്നു വ്യാപാരം. കേരളത്തിന്റെ ചരിത്രത്തിലെ ഏറ്റവും ഉയർന്ന വിലയാണിത്.

പണിക്കൂലിയും (കുറഞ്ഞത് 5-8 ശതമാനം) മൂന്നു ശതമാനം ജി.എസ്.ടിയും കാൽ ശതമാനം പ്രളയസെസും ചേരുമ്പോൾ ഒരു പവൻ ആഭരണം വാങ്ങാൻ കുറഞ്ഞത് 31,000 രൂപയെങ്കിലും നൽകേണ്ടി വരും.

അന്താരാഷ്‌ട്ര വിപണിയിലെ വിലക്കുതിപ്പും ഡോളറിനെതിരെ രൂപയുടെ മൂല്യത്തകർച്ച മൂലം ഇറക്കുമതി ചെലവിലുണ്ടായ വർദ്ധനയുമാണ് പൊന്നിൻ വിലയുടെ മുന്നേറ്റത്തിന് കാരണം. കഴിഞ്ഞമാസം ഔൺസിന് 1,400 ഡോളർ നിലവാരത്തിലായിരുന്ന സ്വർണവില ഇന്നലെ 1,513 ഡോളറിലെത്തി. ഡോളറിനെതിരെ 71.15 എന്ന നിലയിലാണ് രൂപ.

ഈമാസം മാത്രം ഇതുവരെ പവൻ വിലയിലുണ്ടായ വർദ്ധന 2,320 രൂപയാണ്. ഗ്രാമിന് 290 രൂപയും കൂടി.