കോഴിക്കോട്: കോഴിക്കോട് ഈങ്ങാപ്പുഴയിൽ സഹോദരങ്ങൾക്ക് നേരെ സദാചാര ആക്രമണം. ബെെക്കിൽ സഞ്ചരിക്കുകയായിരുന്ന യുവാവിനും സഹോദരിക്കും നേരെയാണ് ആക്രമണം ഉണ്ടായത്. ബൈക്കിന് സൈഡ് നൽകിയില്ലെന്നാരോപിച്ച് റഫീഖ് എന്നയാൾ ആക്രമിച്ചെന്നാണ് പരാതി. ഇയാൾക്കെതിരെ താമരശേരി പൊലീസ് കേസെടുത്തു. ആക്രമണത്തിന്റെ സി.സി.ടി.വി ദൃശ്യങ്ങൾ പുറത്തുവന്നിട്ടുണ്ട്.

ഈങ്ങാപുഴയിൽ വച്ച് ഇന്നലെ വൈകിട്ട് ആറ് മണിയോടെയാണ് സംഭവം. ചെലവൂരിലെ ജോലിസ്ഥലത്ത് നിന്ന് സഹോദരിയ്ക്കൊപ്പം ബൈക്കിൽ പുതുപ്പാടിയിലെ വീട്ടിലേക്ക് പോവുകയായിരുന്നു യുവാവ്. ഈങ്ങാപ്പുഴ പെട്രോൾ പമ്പിന് സമീപം വച്ചാണ് ബൈക്കിന് സൈഡ് നൽകിയില്ലെന്ന് പറഞ്ഞ് റഫീക്ക് എന്നയാൾ ഇവരെ അസഭ്യം പറയുകയും ആക്രമിക്കുകയും ചെയ്തത്. ബൈക്ക് റോഡിനരികിലേക്ക് നിറുത്തി എന്തിനാണ് അസഭ്യം പറഞ്ഞതെന്ന് യുവാവ് ചോദിച്ചതോടെ റഫീക്ക് തന്റെ ബൈക്കിൽ നിന്ന് ഇറങ്ങി യുവാവിനെ മർദ്ദിക്കുകയായിരുന്നു. ബൈക്കും യുവാവും മറിഞ്ഞ് വീഴുന്നത് സമീപത്തെ സി.സി.ടി.വിയിൽ പതിഞ്ഞിട്ടുണ്ട്. പരിക്കേറ്റ യുവാവിനെ താമരശേരി താലൂക്ക് ആശുപത്രിയിൽ പ്രവേശിപ്പിച്ചു. തുടർന്ന് സഹോദരങ്ങൾ പൊലീസിൽ പരാതി നൽകി.