റാന്നി​: പത്തനംതിട്ട,​ പാലക്കാട്,​തൃശൂർ,​ ആലപ്പുഴ,​കണ്ണൂർ ജില്ലകളിലെ ആരാധനാലയങ്ങളും വ്യാപാര കേന്ദ്രങ്ങളും കേന്ദ്രീകരിച്ച് മോഷണം നടത്തുന്ന തൃശൂർ സ്വദേശി കെ.കെ ഫക്രുദ്ദീൻ അറസ്റ്റിൽ. റാന്നിയിലെ പച്ചക്കറിക്കടയിൽ നിന്ന് കഴിഞ്ഞാഴ്ച അമ്പതിനായിരം രൂപ മോഷണം പോയിരുന്നു. ചില ആരാധനാലയങ്ങളിലും മോഷണം നടന്നിരുന്നു.

സംശയാസ്പദമായ സാഹചര്യത്തിൽ ഇയാളെക്കണ്ട പൊലീസ് അറസ്റ്റ് ചെയ്യുകയായിരുന്നു. എന്നാൽ ഇയാൾ ചെയ്ത ചില മോഷണങ്ങൾക്ക് തുമ്പ് ലഭിക്കാൻ കാരണം ഒരു മുട്ടയാണ്. ജൂൺ മാസം അവസാനം ഇയാൾ പള്ളികളിലും ഒരു ഹോട്ടലിലും മോഷണം നടത്തിയിരുന്നു.

ഹോട്ടലിലെ മോഷണത്തിനിടെ ഒരു മുട്ട പൊട്ടിച്ച് കുടിച്ചിരുന്നു. മുട്ട കഴിക്കുമ്പോൾ ഗ്ലൗസ് ധരിച്ചിരുന്നില്ല. വിരലടയാളം മുട്ടത്തോടിൽ നിന്ന് പൊലീസിന് ലഭിച്ചതോടെ അതിനുപിന്നിലും ഫക്രുദ്ദീനാണെന്ന് തിരിച്ചറിയുകയായിരുന്നു. മോഷ്ടിക്കുന്ന പണം കള്ളു കുടിക്കാനും ധൂർത്തടിക്കാനുമാണ് ഇയാൾ ചെലവഴിക്കുന്നതെന്ന് പൊലീസ് പറഞ്ഞു.