സ്ത്രീകൾ പൊതുവെ അനുഷ്ഠിക്കുന്ന വ്രതമാണ് തിങ്കളാഴ്ചവ്രതം. എന്നാൽ,​ ചിങ്ങമാസത്തിലെ തിങ്കളാഴ്ചകൾ ഏറെ പ്രത്യേകതകൾ നിറഞ്ഞതാണ്. ഈ മാസത്തിലെ തിങ്കളാഴ്ചകൾക്ക് ഏറെ ശക്തിയുണ്ടെന്നാണ് വിശ്വാസം. പൊതുവെ ചിങ്ങമാസത്തിലെ തിങ്കളാഴ്ച വ്രതം അനുഷ്ഠിച്ചാൽ ഇരട്ടിഫലം കിട്ടുമെന്നും പറയപ്പെടുന്നു. പാർവതീസമേതനായ ശിവഭഗവാന്റെ ദിവസമായ തിങ്കളാഴ്ച ചിങ്ങമാസത്തിൽ സാധാരണയുള്ളതിനേക്കാൾ ഇരട്ടി ഫലം മാസാദ്യത്തിലെ തിങ്കളാഴ്ചകളിൽ വ്രതം അനുഷ്ഠിച്ചാൽ ലഭിക്കുമെന്നാണ് വിശ്വാസം.

മാസത്തിൽ ആദ്യം വരുന്ന തിങ്കളാഴ്ച മുപ്പെട്ട് തിങ്കൾ എന്നറിയപ്പെടുന്നു. സോമവാര വ്രതം എന്നും അറിയപ്പെടുന്ന ഈ വ്രതം അനുഷ്ഠിക്കുന്നത് ഉത്തമ മംഗല്യ ഭാഗ്യത്തിന് മാത്രമല്ല, ഭദ്രമായ കുടുംബജീവിതത്തിനും വൈധവ്യദോഷ നിവാരണത്തിനും നല്ലതാണ്. കൂടാതെ ചന്ദ്രദോഷശമനത്തിനും മോക്ഷത്തിനും ദാമ്പത്യ പ്രശ്‌നപരിഹാരത്തിനും കുടുംബ ഉന്നതിയുണ്ടാകാനുമെല്ലാം ഉത്തമമാണ്. സോമവാരവ്രതാനുഷ്ഠാനം ശിവ കുടുംബ പ്രീതിക്ക് കാരണമാകും എന്നതും പ്രത്യേകതയാണ്.

ഭഗവാന്റെ അർദ്ധപകുതി ശ്രീപാർവ്വതീദേവിയായതിനാൽ തിങ്കളാഴ്ച ദിവസം ശിവപാവതീ മന്ത്രങ്ങൾ ചേർത്ത് വേണം ശിവനെ ഭജിക്കാൻ. "നമ:ശിവായ ശിവായ നമ:" എന്ന മന്ത്രം നൂറ്റിയെട്ട് പ്രാവശ്യം ജപിക്കുന്നത് അതീവ ഫലദായകമാണ്. ഭഗവാന്റെ അർദ്ധപകുതി ശ്രീപാർവതീ ദേവിയായതിനാൽ തിങ്കളാഴ്ച ദിവസം ശിവപാർവതീ മന്ത്രങ്ങൾ ചേർത്ത് വേണം ഭജിക്കാൻ. ശിവസഹസ്രനാമവും ലളിതാസഹസ്രനാമവും തുല്യപ്രാധാന്യം നൽകി ജപിക്കാവുന്നതാണ്. ഉമാമഹേശ്വരസ്തോത്രവും ജപിക്കണം.

കൂടാതെ ശിവക്ഷേത്രത്തിൽ പാർവതീദേവിയെ ധ്യാനിച്ച് തുമ്പപ്പൂക്കളുംഅല്ലെഹ്കിൽ വെളുത്ത പുഷ്പങ്ങൾ ശ്രീ പരമേശ്വരനെ ധ്യാനിച്ച് കൂവളത്തിലയും നടയ്ക്കൽ സമർപ്പിക്കുന്നതും അത്യുത്തമമാണ്. മാസത്തിൽ ഒരു തിങ്കളാഴ്ച എന്നക്രമത്തിലോ കഴിയാവുന്ന തിങ്കളാഴ്ച എന്ന രീതിയിലോ വ്രതം അനുഷ്ഠിക്കാവുന്നതാണ്. വ്രതദിനത്തിന്റെ തലേന്ന് അതായത് ഉച്ചയ്ക്ക് ശേഷം മുതൽ മത്സ്യമാംസാദികൾ വെടിഞ്ഞു വ്രതം ആരംഭിക്കണം. ഞായറാഴ്ച രാത്രിയിൽ അരിയാഹാരം ഒഴിവാക്കുന്നതും നന്ന്, ഗോതമ്പ് കൊണ്ടുള്ള ഭക്ഷണമോ പഴങ്ങളോ കഴിക്കാവുന്നതാണ്.

തിങ്കളാഴ്ച ദിനത്തിൽ സൂര്യോദയത്തിനുമുന്നെ കുളിച്ച് ശരീരശുദ്ധി വരുത്തി ഉമാസമേതനായ ഭഗവാനെ ഭക്തിയോടെ ഭജിക്കണം. നെറ്റിയിൽ ഭസ്മവും കുങ്കുമവും ചേർത്ത് തൊടുന്നത് ശിവശക്തീ പ്രീതികരമാണ്. തുടർന്ന് ശിവക്ഷേത്ര ദർശനം നടത്തി പിൻവിളക്ക്, കൂവളമാല എന്നിവ സമർപ്പിക്കുന്നതും നല്ലതാണ്. പിറ്റേന്ന് കുളിച്ചു ക്ഷേത്രത്തിലെ തീർഥമോ തുളസിവെള്ളമോ സേവിച്ചു വ്രതം അവസാനിപ്പിക്കാം. ഉമാമഹേശ്വര പൂജ, സ്വയംവരപുഷ്‌പാഞ്ജലി എന്നിവ സമർപ്പിക്കുന്നത് വിവാഹ തടസം നീങ്ങാൻ ഉത്തമമാണ്. ജലധാര സമർപ്പണവും നന്ന്.