തിരുവനന്തപുരം: സി.പി.ഐ മാ‌ച്ചിൽ നേതാക്കൾക്ക് മർദ്ദനമേറ്റ സംഭവത്തിൽ കൊച്ചി സെൻട്രൽ എസ്.ഐയ്ക്കെതിരായ നടപടി വൈകിപ്പോയെന്ന് എൽദോ എബ്രഹാം എം.എൽ.എ പ്രതികരിച്ചു. ഞാറയ്ക്കൽ സി.ഐയെ സസ്പെൻഡ് ചെയ്യണമെന്ന ആവശ്യത്തിൽ പാർട്ടി ഉറച്ചുനിൽക്കുന്നതായും അദ്ദേഹം പറഞ്ഞു.

സംഭവത്തിൽ സർക്കാരിൽ നിന്ന് നീതി പ്രതീക്ഷിച്ചിരുന്നു. ഇപ്പോൾ എടുത്ത നടപടിയിൽ തൃപ്തിയുണ്ടോയെന്ന് പാർട്ടി നേതൃത്വമാണ് പറയേണ്ടത്. പൊലീസിന്റെ തെറ്റായ കാര്യങ്ങൾ ഡി.ജി.പി ന്യായീകരിക്കുന്നത് ശരിയല്ല. പൊലീസിൽ തിരുത്തപ്പെടേണ്ട ഒരുപാട് കാര്യങ്ങൾ നടക്കുന്നുണ്ടെന്നും എൽദോ എബ്രഹാം പറഞ്ഞു.

എസ്.ഐ വിപിൻ ദാസിനെതിരായ നടപടിയെ സ്വാഗതം ചെയ്യുന്നതായി സി.പി.ഐ എറണാകുളം ജില്ലാ സെക്രട്ടറി പി. രാജു പ്രതികരിച്ചു. ഇപ്പോഴത്തെ നടപടിയിൽ ഭാഗികമായ സംതൃപ്തിയാണുള്ളത്. ഞാറക്കൽ സി.ഐക്കെതിരെയും നടപടി എടുക്കാൻ മുഖ്യമന്ത്രിയോട് ആവശ്യപ്പെടുമെന്നും പി.രാജു പറഞ്ഞു.