ലഖ്‌നൗ: മുത്തലാഖ് ചൊല്ലിയ യുവതിയെ ഭർത്താവും ബന്ധുക്കളും ചേർന്ന് തീകൊളുത്തി. മുത്തലാഖ് ചൊല്ലിയിട്ടും വീട്ടിൽ തുടർന്ന സയീദ(22)​യെയാണ് തീകൊളുത്തി കൊന്നത്. അഞ്ച് വയസുള്ള മകൾ നോക്കി നിൽക്കയാണ് യുവതിയെ തീകൊളുത്തിയത്. ഭർത്താവ് മുത്തലാഖ് ചൊല്ലിയെന്ന് ചൂണ്ടിക്കാട്ടി യുവതി നേരത്തെ പൊലീസിൽ പരാതി നൽകിയിരുന്നു. എന്നാൽ,​ പരാതി രജിസ്റ്റർ ചെയ്യാൻ തയ്യാറാകാതിരുന്ന പൊലീസ് യുവതിയോട് അതേ വീട്ടിൽ തുടരാൻ ആവശ്യപ്പെടുകയായിരുന്നു. യു.പിയിലെ ശ്രാവസ്തി ജില്ലയിൽ വെള്ളിയാഴ്ചയായിരുന്നു സംഭവം.

യുവതിയെ ഭർത്താവ് ഫോണിലൂടെ മുത്തലാഖ് ചൊല്ലുകയായിരുന്നെന്ന് യുവതിയുടെ ബന്ധുക്കൾ പറയുന്നു. ഇതിന് പിന്നാലെയാണ് യുവതി പൊലീസിനെ സമീപിച്ചത്. എന്നാൽ,​ ഭർത്താവിനൊപ്പം തുടരാനും ആഗസ്റ്റ് 15 ന് ഇരുവരോടും സ്‌റ്റേഷനിൽ ഹാജരാക്കാനും പൊലീസ് പറയുകയായിരുന്നു. എന്നാൽ,​ തന്റെ വീട്ടിൽ ഇനി തുടരാൻ ഭാര്യയെ അനുവദിക്കില്ലെന്നും വീട് വിട്ട് പോകണമെന്നും യുവാവ് യുവതിയോട് ആവശ്യപ്പെട്ടതായി ബന്ധുക്കൾ പറഞ്ഞു.

എന്നാൽ,​ യുവതി അതിന് തയ്യാറായില്ല. ഇതിന് പിന്നാലെയായിരുന്നു സയീദയെ കൊലപ്പെടുത്താൻ അവർ തീരുമാനിച്ചതെന്നും ബന്ധുക്കൾ പറയുന്നു. ഭർത്താവിനും കുടുംബത്തിനുമെതിരെ സ്ത്രീധന പീഡനം, കൊലപാതകം എന്നീ വകുപ്പുകൾ പ്രകാരം പൊലീസ് കേസ് രജിസ്റ്റർ ചെയ്തു.