ലണ്ടൻ: കാശ്മീർ വിഭജനത്തെ തുടർന്ന് ഇന്ത്യയും പാകിസ്ഥാനും തമ്മിലുള്ള സംഘർഷാവസ്ഥ രൂക്ഷമായിരിക്കുകയാണ്. ഇതേസമയം ലോകത്തിന്റെ വിവിധ ഭാഗങ്ങളിൽ പ്രതികരണങ്ങളും പ്രതിഷേധങ്ങളും ഉടലെടുത്തിട്ടുണ്ട്. ലണ്ടനിലെ ഇന്ത്യൻ എംബസിക്ക് മുന്നിൽ നടന്ന പ്രതിഷേധമാണ് ഇപ്പോൾ വാർത്തകളിൽ നിറയുന്നത്. "കശ്‌മീരിനെ സ്വതന്ത്രമാക്കുക'', "മോദി, മേക്ക് ടീ, നോട്ട് വാർ" തുടങ്ങിയ വാചകങ്ങളെഴുതിയ പ്ലക്കാർഡുകൾ പിടിച്ചായിരുന്നു പാക് അനുകൂലികൾ പ്രതിഷേധം നടത്തിയത്. ഖലിസ്ഥാൻ വാദികളും പ്രതിഷേധക്കാർക്കൊപ്പമുണ്ടായിരുന്നു.

എന്നാൽ പ്രതിഷേധക്കാർ മുദ്രാവാക്യങ്ങൾക്ക് പുറമെ ഇന്ത്യൻ പതാകയെ അവഹേളിക്കുന്ന സംഭവവും നടന്നു. എംബസിയുടെ മുന്നിൽ ഇന്ത്യക്കാർ നിൽക്കുന്ന ഭാഗത്തേക്കു വന്ന പ്രതിഷേധക്കാരിലൊരാൾ ഇവരുടെ കയ്യിലുണ്ടായിരുന്ന ത്രിവർണപതാക തട്ടിപ്പറിച്ച് പ്രതിഷേധക്കാർക്ക് എറിഞ്ഞു കോടുത്തു. തുടർന്ന് ഇന്ത്യക്കാരും മാദ്ധ്യമപ്രവർത്തകരും പോലീസും നോക്കിനിൽക്കേ ത്രിവർണ്ണ പതാക പ്രതിഷേധക്കാർ വലിച്ചുകീറി നിലത്തിച്ച് ചവിട്ടി. ഉശിരുണ്ടെങ്കിൽ തിരിച്ചു പിടിക്ക് എന്ന് അവർ വെല്ലുവിളിക്കുകയും ചെയ്തു.

ഇതുകണ്ട ഇന്ത്യൻ മാദ്ധ്യമപ്രവർത്തക പൂനം ജോഷി അവർക്കിടയിലേക്ക് ഒാടിച്ചെന്ന് പ്രതിഷേധക്കാരിൽ നിന്നും പതാകയുടെ രണ്ടു കഷ്ണങ്ങളും പിടിച്ചുവാങ്ങുകയും ചെയ്തു. സാഹസികമായ പൂനത്തിന്റെ തിരിച്ചടിയിൽ നോക്കിനിൽക്കാനേ പ്രതിഷേധക്കാർ കഴിഞ്ഞുള്ളൂ. വാർത്താ ഏജൻസിയായ എൻ.ഐ.എക്കു വേണ്ടി സ്വാതന്ത്ര്യ ദിനാഘോഷങ്ങൾ റിപ്പോർട്ട് ചെയ്യാനെത്തിയതായിരുന്നു പൂനം ജോഷി. സംഭവത്തിൽ ദൃശ്യങ്ങളും എൻ.ഐ.എ പുറത്തുവിട്ടിട്ടുണ്ട്. ഇന്ത്യയുടെ ദേശീയ പതാക നിലത്തിട്ടു ചവിട്ടിയരക്കുന്നത് കണ്ട് സഹിച്ചു നിൽക്കാൻ കഴിയാതിരുന്നതുകൊണ്ടാണ് ഓടിച്ചെന്നു പിടിച്ചുവാങ്ങിയതെന്നു പൂനം ജോഷി പറഞ്ഞു. ഇത്ര വികൃതമായ രീതിയിൽ മറ്റൊരു രാജ്യത്തിൻറെ ദേശീയപതാകയെ അപമാനിക്കുന്ന രീതിയിലുള്ള അക്രമം ആദ്യമായാണ് കാണുന്നതെന്നും അവർ കൂട്ടിച്ചേർത്തു.

#WATCH: Journalist Poonam Joshi covering for ANI the #IndianIndependenceDay celebrations outside Indian High Commission in London,where Pro-Pak & Pro-Khalistan protests were also underway, snatches 2 torn parts of tricolour from Khalistan supporters who had seized it from Indians pic.twitter.com/Go7X2tVZXg

— ANI (@ANI) August 17, 2019