ഭൂമിയിൽ ഒരു വലിയ ഉൽക്ക പതിക്കുെമെന്നും അതിനെ തടയാൻ ഭൂമിയിലെ സംവിധാനങ്ങൾക്ക് സാധിക്കില്ലെന്നും സ്‌പേസ് എക്‌സ് സ്ഥാപകനും സി.ഇ.ഓയുമായ ഇലോൺ മസ്‌ക് പ്രവചിക്കുന്നു. നിലവിലെ ബഹിരാകാശ പ്രതിരോധങ്ങളെ കുറിച്ചുള്ള തന്റെ അഭിപ്രായങ്ങൾ പങ്കുവയ്ക്കുന്നതിനിടെയാണ് അദ്ദേഹത്തിന്റെ പ്രവചനം. 2029 ഓടെ ഭൂമിയ്ക്ക് സമീപത്തുകൂടി കടന്നുപോവാനിരിക്കുന്ന 99942 അപോഫിസ് ഉൽക്കയെ കുറിച്ചുള്ള ട്വീറ്റിൽ ഭാവിയിൽ ഭൂമി നേരിടാൻ പോവുന്ന വിപത്തിനെ കുറിച്ചും മസ്ക് പ്രവചിച്ചു.

99942 അപോഫിസ് ഉൽക്ക ഭൂമിക്ക് ഭീഷണിയല്ല. എന്നാൽ കുറച്ച് കാലം കഴിഞ്ഞാൽ വലിയ ഒരു ഉൽക്ക ഭൂമിയിൽ പതിക്കുമെന്നും അത് തടയാൻ ഭൂമിയിൽ നിലവിലുള്ള ഒരു പ്രതിരോധ സംവിധാനത്തിനും കഴിയില്ല. 99942 അപോഫിസ് 2029 ഏപ്രില്‍ 13 നാണ് ഭൂമിയെ കടന്നുപോവുകയെന്ന് നാസ വ്യക്തമാക്കിയിരുന്നു. പത്ത് വർഷത്തിന് ശേഷമുള്ള സംഭവമാണെങ്കിലും അതിനെ കുറിച്ചുള്ള പഠനങ്ങൾ നാസ ഇപ്പോഴേ തുടങ്ങിയിട്ടുണ്ട്. ഭൂമിയ്ക്ക് ഭീഷണി സാധ്യതയുള്ള 2000 ഉൽക്കകളിൽ ഒന്നാണ് 99942 അപോഫിസ്. ഭൂമിയോടടുത്ത് 19000 മൈൽ അല്ലെങ്കില്‍ 31000 മൈൽ അകലെ ഇത് എത്തുമെന്നാണ് ശാസ്ത്രലോകം കണക്കാക്കുന്നത്.

അപോഫിസ് ഉൽക്ക ഭൂമിയിൽ പതിച്ചാൽ വടക്കേ അമേരിക്കയുടെ പടിഞ്ഞാറൻ തീരം മുഴുവന്‍ തുടച്ചും നീക്കുംവിധം ശക്തമായ സുനാമി ഉണ്ടാകുമെന്ന് ശാസ്ത്രജ്ഞനായ നീൽ ഡിഗ്രാസ് ടൈസണ്‍ പറയുന്നു. ബഹിരാകാശ വാഹനങ്ങൾ ഭൂമിയെ വലം വെയ്ക്കുന്ന ദൂരപരിധിയായത് കൊണ്ട് ശാസ്ത്രലോകം ആശങ്കയിലാണ്. ഇതിനെ കൂടാതെ 2027ൽ 1990 എം.യു എന്നൊരു ഉൽക്കയും ഭൂമിയ്ക്ക് അപകടകരമാവും വിധം സമീപത്തുകൂടി കടന്നുപോകുന്നുണ്ട്.