കൊച്ചി: ഉത്സവകാലത്തോട് അനുബന്ധിച്ച് റീട്ടെയിൽ വായ്പകൾക്ക് കുറഞ്ഞ പലിശനിരക്കും പ്രോസസിംഗ് ഫീസിൽ ഇളവും ഉൾപ്പെടെ ഒട്ടേറെ ആനുകൂല്യങ്ങൾ എസ്.ബി.ഐ പ്രഖ്യാപിച്ചു. കാർ വായ്പകൾക്ക് പ്രോസസിംഗ് ഫീസിൽ ഇളവ് ലഭിക്കും. കാർ വായ്പകൾക്ക് 8.70 ശതമാനം മുതലാണ് പലിശനിരക്ക്. പലിശനിരക്കിൽ വർദ്ധനയുണ്ടാവില്ലെന്ന പ്രത്യേകതയുമുണ്ട്.

ബാങ്കിന്റെ ഡിജിറ്റൽ സംവിധാനമായ 'യോനോ' മുഖേനയോ വെബ്‌സൈറ്റ് വഴിയോ കാർ വായ്പ എടുക്കുന്നവർക്ക് പലിശയിൽ 0.25 ശതമാനം അധിക ഇളവ് ലഭിക്കും. ശമ്പളാടിസ്ഥാനത്തിൽ ജോലി ചെയ്യുന്നവർക്ക് കാറിന്റെ ഓൺറോഡ് വിലയുടെ 90 ശതമാനം വരെ വായ്പ ലഭിക്കും. 20 ലക്ഷം രൂപവരെയുള്ള വ്യക്തിഗത (പേഴ്ഡസണൽ) വായ്പകൾ 10.75 ശതമാനം പലിശനിരക്കിലും തിരിച്ചടവിന് ആറുവർഷത്തെ കാലാവധിയിലും ലഭ്യമാണ്. ഇത്, ഇ.എം.ഐയുടെ ബാദ്ധ്യത കുറയാൻ സഹായകമാണ്.

സാലറി അക്കൗണ്ടുള്ളവർക്ക് 'യോനോ' വഴി പ്രീഅപ്രൂവ്ഡ് ഡിജിറ്റൽ വായ്പ വെറും നാല് ക്ലിക്കുകളിലൂടെ നേടാം. വിദ്യാഭ്യാസ വായ്പകൾക്ക് 8.25 ശതമാനം മുതലാണ് പലിശനിരക്ക്. ഇന്ത്യയിൽ പഠിക്കാൻ 50 ലക്ഷം രൂപവരെയും വിദേശ പഠനത്തിന് 1.50 കോടി രൂപവരെയും വായ്പ ലഭിക്കും. വായ്പാ ഇടപാടുകാർക്ക് തിരിച്ചടവിന് 15 വർഷം വരെ കാലാവധിയും എസ്.ബി.ഐ ലഭ്യമാക്കുന്നുണ്ട്. ഇ.എം.ഐയിലെ അധിക ബാദ്ധ്യതയിൽ നിനന് ഇതുവഴി ആശ്വാസം നേടാനാകും.

അതിവേഗ വാഹന വായ്പാ പദ്ധതിയുമായി ഫെഡറൽ ബാങ്ക്

ഫെഡറൽ ബാങ്ക് അതിവേഗ വാഹന വായ്പാ പദ്ധതി അവതരിപ്പിച്ചു. വായ്പാ അപേക്ഷയും രേഖകളും ഓൺലൈനായി സ്വീകരിച്ച്, പരിശോധിച്ച് മണിക്കൂറുകൾക്കകം വായ്പ അനുവദിക്കും. ബാങ്കിന്റെ മുംബയ്, എറണാകുളം എന്നിവിടങ്ങളിലെ ശാഖകളിലാണ് പദ്ധതി അവതരിപ്പിച്ചത്. വൈകാതെ മറ്റിടങ്ങളിലേക്കും വ്യാപിപ്പിക്കും.

അപേക്ഷയോടൊപ്പമുള്ള രേഖകളും അപേക്ഷകരുടെ മുൻകാല വായ്പാ ഇടപാടുകളും കൃത്യമായി അതിവേഗം പരിശോധിക്കാനുള്ള നിർമ്മിത ബുദ്ധി (എ.ഐ) അധിഷ്ഠിത സംവിധാനത്തോടെയാണ് പദ്ധതി അവതരിപ്പിക്കുന്നത്. ഉപഭോക്താവിന്റെ തിരിച്ചടവ് ശേഷിയും അതിവേഗത്തിൽ പരിശോധിക്കാനാകും. ഫെഡറൽ ബാങ്ക് ചീഫ് ഓപ്പറേറ്റിംഗ് ഓഫീസർ (സി.ഒ.ഒ) ശാലിനി വാര്യരാണ് പദ്ധതി അവതരിപ്പിച്ചത്. ഈ വായ്പാ പദ്ധതിയിലൂടെയുള്ള ആദ്യ വാഹനം ശാലിനി വാര്യർ, ഹ്യുണ്ടായ് മോട്ടോർ ഇന്ത്യ മേധാവി രാഹുൽ ജെയ്ൻ എന്നിവർ ചേർന്ന് കൈമാറി.

ഉത്സവകാല ഓഫറായി മാരുതി, ഹ്യുണ്ടായ് എന്നിവയുടെ മോഡലുകൾക്ക് ഓൺറോഡ് വിലയുടെ 95 ശതമാനം വരെ വായ്പയായി നൽകുമെന്ന് ഫെഡറൽ ബാങ്ക് കേരള ഹെഡ്ഡും എക്സിക്യൂട്ടീവ് വൈസ് പ്രസഡന്റുമായ ജോസ് കെ. മാത്യു പറഞ്ഞു. ഫെഡറൽ ബാങ്ക് ഡിജിറ്റൽ വിഭാഗം മേധാവി പി.വി. ജിതേഷ് ചടങ്ങിൽ സംബന്ധിച്ചു.