ചീരക്കൃഷി ചെയ്യാൻ പ്രത്യേകിച്ചൊരു സമയം വേണ്ട എന്നത് തന്നെയാണ് ചീരയെ ജനപ്രിയമാക്കുന്നത്. പറമ്പിലോ, ഗ്രോബാഗിലോ ചട്ടിയിലോ ചാക്കിലോ ഒക്കെ ചീര നടാം. അതുപോലെ പണകളിൽ മറ്റു വിളകൾക്കിടയിൽ ഇടയ്ക്കിടെ ചീരയും നടാവുന്നതാണ്. ആദ്യം മണ്ണ് കിളച്ചിളക്കി ഉദ്ദേശം ഒരു മീറ്റർ വീതിയിലും ആവശ്യാനുസരണം നീളത്തിലും നിരപ്പാക്കുക. അതിലേക്ക് സ്യൂഡോ മോണാസ് ലായനിയിൽ കുതിർത്ത ചീര വിത്ത് പാകാം. ഇടയ്ക്ക് മണൽ കൂടി കലർത്തി വിതറുന്നത് വിത്തുകൾ എല്ലാ സ്ഥലത്തേക്കും വ്യാപിക്കാൻ സഹായിക്കും. വെള്ളം തളിക്കുമ്പോൾ മണ്ണിളകി തെറിക്കാൻ പാടില്ലാത്തതുകൊണ്ട് ഇതിനു മുകളിലേക്ക് വളരെ നേർത്ത നിലയിൽ അൽപ്പം പൊടിമണ്ണും തൂകി കൊടുക്കാം. പാകിയ ചീരവിത്തുകൾ ചിലപ്പോൾ ഉറുമ്പുകൾ കൊണ്ട് പോകാൻ സാധ്യത ഉണ്ട്. അതുകൊണ്ട് വിത്ത് പാകിയത്തിനു ശേഷം അല്പം റവയോ അരിപ്പൊടിയോ വിതറിയിടുന്നത് നന്നായിരിക്കും. മൂന്നാം ദിവസം ചീര കിളിർത്തു വരും.
ഓരോ ചീരച്ചെടിയിലും അഞ്ചോ ആറോ ഇലകൾ ആകുമ്പോൾ ഗോമൂത്രം നേർപ്പിച്ച് മണ്ണ് നനച്ചു കൊടുക്കാം. ആഴ്ചയിൽ ഒന്ന് എന്ന ക്രമത്തിൽ ഇത് ചെയ്യാം. ചാണകപ്പൊടി ഉണ്ടെങ്കിൽ ഇടാം, കടല പിണ്ണാക്ക് കുതിർത്ത് അതിന്റെ തെളി എടുത്ത് അഞ്ചിരട്ടി വെള്ളത്തിൽ നേർപ്പിച്ചു തളിക്കാം. ഇനി ഗ്രോ ബാഗിൽ ആണെങ്കിൽ നന്നായി പൊടിഞ്ഞ മണ്ണും ചകിരി ചോറും ചാണക പൊടിയും മിക്സ് ചെയ്യാം. ഒരു ഗ്രോ ബാഗിൽ പത്തു പതിനഞ്ച് വിത്തുകൾ ഇടുക. ഇല വരുമ്പോഴേക്കും നാല് വീതം തൈകൾ അകലം നോക്കി നിർത്തി ബാക്കി പിഴുത് മാറ്റുക. ചീരയെ പ്രധാനമായും ബാധിക്കുന്നത് ഇലതീനി പുഴുക്കൾ, കൂട് കെട്ടി പുഴു എന്നിവയുടെ ആക്രമണങ്ങളാണ്. ഇവയെ പ്രതിരോധിക്കാൻ വേപ്പിൻ കുരുസത്ത് ഒരു ലിറ്റർ വെള്ളത്തിൽ ലയിപ്പിച്ച് ഇലകളിൽ തളിക്കാം.