ലക്‌നൗ: ബക്രീദിന് പുതിയ കുർത്തയും പൈജാമയും വാങ്ങി നൽകാത്ത ഭാര്യയെ ജയിലിലുള്ള ഭർത്താവ് മുത്തലാഖ് ചൊല്ലിയതായി പരാതി. ഉത്തർപ്രദേശിലെ അമ്രോഹയിലെ മുർഷിദ എന്ന യുവതിയെയാണ് കൊലപാതക കേസിൽ ജയിൽ ശിക്ഷ അനുഭവിച്ച് വരുന്ന ഭർത്താവ് മൊഴി ചൊല്ലിയത്.

ബക്രീദിന് ഭർത്താവ് കുർത്തയും പൈജാമയും വാങ്ങി നൽകാൻ ആവശ്യപ്പെട്ടെന്നും തനിക്ക് അതിന് സാധിച്ചില്ലെന്നും യുവതി പറയുന്നു. അതിന് ശേഷം ജയിലിൽ പോയി കണ്ടപ്പോൾ ഇക്കാര്യം പറഞ്ഞ് വഴക്കിടുകയും, തന്നെ മുത്തലാഖ് ചൊല്ലിയെന്നും മുർഷിദ പരാതിയിൽ പറയുന്നു.

ഇക്കാര്യം പ്രധാനമന്ത്രിയുടെ ശ്രദ്ധയിൽപ്പെടുത്തി തനിക്ക് നീതി വാങ്ങിത്തരണമെന്നാണ് മുർഷിദയുടെ ആവശ്യം. പരാതിയിൽ അന്വേഷണം ആരംഭിച്ചതായി പൊലീസ് വ്യക്തമാക്കി. 2014 മുതൽ ഒരു കൊലപാതക്കേസിൽ ജയിൽ ശിക്ഷ അനുഭവിച്ച് വരികയാണ് മുർഷിദയുടെ ഭർത്താവ്.