മലപ്പുറം: മതവിമർശനവും പ്രണയവും കാരണം കുടുംബത്തിൽ നിന്നും തന്റെ സഹോദരൻമാരിൽ നിന്നും ഭീഷണി നേരിടുന്നുവെന്ന് പറഞ്ഞുകൊണ്ട് മലപ്പുറം സ്വദേശിയായ പെൺകുട്ടി. ഫേസ്ബുക്ക് പോസ്റ്റ് വഴിയാണ് താൻ നേരിടുന്ന ഭീഷണിയെക്കുറിച്ച് ഈ പെൺകുട്ടി വെളിപ്പെടുത്തിയത്. ഷറീന സി.കെ എന്ന ഫേസ്ബുക്ക് ഐ.ഡിയിലാണ് കുറിപ്പ് പോസ്റ്റ് ചെയ്തിരിക്കുന്നത്. തൃശൂരിൽ താമസിക്കുന്ന മലപ്പുറം സ്വദേശിയാണ് പെൺകുട്ടിയെന്നും പ്രൊഫൈലിൽ കാണാം. താൻ പ്രണയിച്ചതിന് ഒരു സഹോദരൻ തന്നെ ഉപദ്രവിച്ചതായി പെൺകുട്ടി കുറിപ്പിൽ പറയുന്നുണ്ട്. ഇയാൾ പെൺകുട്ടിയുടെ മുടിയിൽ പിടിച്ച് വലിച്ചതായും, കഴുത്ത് ഞെരിച്ചതായും പെൺകുട്ടി പറയുന്നു. ഇസ്ലാം മതം വിട്ടു പോകുന്നവരെ കൊല്ലണം എന്ന് തന്നെയാണ് മതം പറയുന്നതെന്നും പെൺകുട്ടിയോട് മറ്റൊരു സഹോദരൻ പറഞ്ഞു. കെവിൻ വധം പുറത്ത് വന്നത് തെളിവുള്ളത് കൊണ്ടാണെന്നും തെളിവ് അവശേഷിപ്പിക്കാതെ പെൺകുട്ടിയെ കൊന്ന് കളയും എന്ന് ഈ സഹോദരന്റെ ഭാര്യയും പെൺകുട്ടിയോട് പറഞ്ഞു.

പെൺകുട്ടിയുടെ കുറിപ്പിന്റെ പൂർണരൂപം ചുവടെ:

'ഞാൻ സേഫ് ആണ്...സഹോദരന്മാരുടെ ഒരാഴ്ചത്തെ ശാരീരികവും മാനസികവുമായ പീഡനം ആണ് എന്നെ ഈ ഒരു അവസ്ഥയിൽ എത്തിച്ചത്.... മതവിശ്വാസവും മതവിമര്ശനവും എന്റെ പ്രണയവും തന്നെയാണ് അവരെ കൊണ്ട് ഇത് ചെയ്യിക്കാനുള്ള കാരണം... പോലീസിൽ റിപ്പോർട്ട്‌ ചെയ്താലും കൊല്ലും എന്നതായിരുന്നു ഭീഷണി...

ഫോൺ പിടിച്ചു വാങ്ങി 5 ദിവസം യാതൊരു കമ്മ്യൂണിക്കേഷൻ ഇല്ലാതെ ഇരുന്നു... ചില സാങ്കേതിക പ്രശ്നങ്ങൾ എന്നെ പരാതി കൊടുക്കുന്നതിൽ നിന്ന് പിന്തിരിച്ചു... കഴിഞ്ഞ ദിവസം എന്റെ വലിയ സഹോദരൻ കഴുത്തിൽ പിടിച്ചു ഞെരിക്കുകയും മുടിപിടിച്ചു വലിച്ചു മർദിക്കുകയും ചെയ്തു... മതപണ്ഡിതൻ ആയ എന്റെ ഒരു സഹോദരൻ പറഞ്ഞത് ഇസ്ലാം വിടുന്നവരെ കൊല്ലാൻ തന്നെയാണ് മതം പറയുന്നത് എന്നാണ്... കെവിൻ വധക്കേസ് പുറത്ത് വന്നത് തെളിവ് ഉള്ളത് കൊണ്ട് മാത്രം ആണെന്നും തെളിവ് ഇല്ലാതെ എന്നെ തീർക്കാൻ അറിയാം എന്നുമാണ് വലിയ സഹോദരന്റെ ഭാര്യ പറഞ്ഞത്...