പാലക്കാട്: മഴക്കെടുതിയിൽ ജില്ലയിൽ ഒരു മരണം. അട്ടപ്പാടി ഷോളയൂർ പഞ്ചായത്ത് ചുണ്ടകുളം ഊരിൽ വീടിന് മുകളിലേക്ക് മരം കടപുഴകി വീണ് കാളിയുടെ മകൻ കാര (50) മരിച്ചു. ഇന്നലെ പുലർച്ചെയാണ് സംഭവം. ഭാര്യ മാരി സാരമായ പരുക്കുകളോടെ രക്ഷപ്പെട്ടു. മക്കൾ: രങ്കൻ, കാഞ്ചന, കവിത, ശിവലക്ഷ്മി.

മൂന്ന് ദിവസമായി തുടരുന്ന കനത്ത മഴയിൽ അട്ടപ്പാടി തീർത്തും ഒറ്റപ്പെട്ടു. കുറുമ്പ മേഖലയിലെ ഗലസി, മേലെ തുടുക്കി, തുടുക്കി, കിണറ്റുകര, മുരുഗള ഊരുകളിൽ വൈദ്യുതി- ഗതാഗത- ഫോൺ സംവിധാനമില്ലാത്ത നിലയിലാണ്.

സൈലന്റ് വാലിയിലും മംഗലം ഡാം പ്രദേശത്തും ഇന്നലെ ഉച്ചയോടെ ഉരുൾപൊട്ടലുണ്ടായി. ആളപായമില്ല. മണ്ണാർക്കാട് താലൂക്കിൽ രണ്ടും പാലക്കാട് ഒന്നും ദുരിതാശ്വാസ ക്യാമ്പ് തുറന്നു. കാഞ്ഞിരപ്പുഴ,​ മംഗലം ഡാമുകൾ തുറന്നതിനാൽ തൂത,​ ഗായത്രി പുഴകളുടെ തീരത്തുള്ളവർ ജാഗ്രത പാലിക്കണമെന്ന് അധികൃതർ അറിയിച്ചു.

ജില്ലയിലെ വിദ്യാഭ്യാസ സ്ഥാപനങ്ങൾക്ക് ഇന്ന് അവധി പ്രഖ്യാപിച്ചു. ഒറ്റപ്പാലം, ഷൊർണൂർ, ലക്കിടി, പട്ടാമ്പി മേഖലകളിൽ വ്യാപക കൃഷിനാശം സംഭവിച്ചു.