പാലക്കാട്: സാമൂഹ്യനീതി വകുപ്പിന്റെ ആഭിമുഖ്യത്തിൽ ജില്ലാ പഞ്ചായത്ത് ഗ്രാമപഞ്ചായത്തുകളുമായി സഹകരിച്ച് ഭിന്നശേഷിക്കാർക്കായി നടപ്പാക്കുന്ന മുച്ചക്രവാഹനത്തിന്റെ രണ്ടാംഘട്ട വിതരണോദ്ഘാടനം ജില്ലാ പഞ്ചായത്ത് പ്രസിഡന്റ് കെ. ശാന്തകുമാരി നിർവഹിച്ചു. ശാരീരികമായി വെല്ലുവിളി നേരിടുന്നവർക്ക് സ്വന്തമായി തൊഴിൽ കണ്ടെത്തുകയെന്ന ലക്ഷ്യത്തോടെ നടപ്പാക്കുന്ന പദ്ധതിയിൽ 22 ഗുണഭോക്താകൾക്കാണ് വാഹനം വിതരണം ചെയ്തത്. ജില്ലയിലെ മുഴുവൻ ഗ്രാമ പഞ്ചായത്തുകളിൽ നിന്നും അർഹരായ ഗുണഭോക്താക്കളെ കണ്ടെത്തി ഡിസംബറോടെ പദ്ധതി പൂർത്തീകരിക്കുകയാണ് ലക്ഷ്യം. ഗുണഭോക്താക്കൾക്ക് വാഹനം കൈമാറുന്നതിന് മുമ്പ് ലേണേഴ്‌സ് ലൈസൻസ് ഉറപ്പാക്കേണ്ടതിനാൽ മോട്ടോർ വാഹന വകുപ്പിന്റെ സഹകരണത്തോടെ അദാലത്ത് സംഘടിപ്പിക്കുമെന്നും പ്രസിഡന്റ് അറിയിച്ചു.
ജില്ലാ പഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്‌സൺ ബിന്ദു സുരേഷ് അധ്യക്ഷയായി. വൈസ് പ്രസിഡന്റ് ടി.കെ നാരായണദാസ് മുഖ്യാതിഥിയായി. ജില്ലാപഞ്ചായത്ത് അംഗങ്ങളായ ഗീത, കെ.ബിനുമോൾ, സി.അച്യുതൻ, വി.മുരുകദാസ്, ജില്ലാ പഞ്ചായത്ത് സെക്രട്ടറി കെ.സി. സുബ്രഹ്മണ്യൻ, ജില്ലാ സാമൂഹ്യനീതി ഓഫീസർ എം.സന്തോഷ് ബാബു എന്നിവർ സംസാരിച്ചു.