മല്ലപ്പള്ളി സ്വകാര്യ ബസ് സ്റ്റാൻഡിനുള്ളിൽ അഡ്വ.മാത്യു ടി തോമസ് എം.എൽ.എയുടെ ആസ്തി വികസന ഫണ്ടിൽ നിന്നും തുക ചെലവഴിച്ച് നിർമ്മിക്കുന്ന ശൗചാലയത്തിന് ഭരണാനുമതിയായി. കൊച്ചി ആസ്ഥാനമായ കേരളാ ഇലക്ടിക്കൽ ആൻഡ് അലൈഡ് എൻജിനീയറിംഗ് കമ്പനി ലിമിറ്റഡ് (കെൽ) എന്ന സ്ഥാപനം നിർവഹണ ഏജൻസിയാണ് നിർമ്മാണം നടത്തുന്നത്. 115 ലക്ഷം രൂപ അടങ്കൽ തുകയായി വകയിരുത്തി കേരളാ ഗവർണർക്കുവേണ്ടി ഗവ.ജോയിന്റ് സെക്രട്ടറി പാറ്റ്‌സി സ്റ്റീഫനാണ് കഴിഞ്ഞദിവസം ഉത്തരവിറക്കിയത്. താലൂക്ക് ആസ്ഥാനത്ത് എത്തുന്നവർക്ക് പ്രാഥമിക ആവശ്യങ്ങൾക്ക് മതിയായ സൗകര്യമില്ലെന്ന് പഞ്ചായത്ത് നൽകിയ നിവേദനത്തെ തുടർന്നാണ് എം.എൽ.എ ഇതിനായി തുക വകയിരുത്തിയത്. പഞ്ചായത്ത് കണ്ടെത്തി കൈമാറിയ സ്ഥലത്താണ് നിർമ്മാണം നടത്തുന്നത്. ഇരുനിലകളിലായി വിമാനത്താവളങ്ങിൽ പ്രവർത്തിക്കുന്ന ശുചിമുറിയുടെ മാതൃകയിലാണ് ശുചിമുറി സമുച്ചയം നിർമ്മിക്കുന്നത്. ഇതിനോടനുബന്ധിച്ച് ആവശ്യമെങ്കിൽ വിശ്രമകേന്ദ്രവും ഒരുക്കുമെന്ന് എം.എൽ.എ പറഞ്ഞു. നേരത്തെ ടോയ്‌ലറ്റ് പ്രവർത്തിച്ച സ്ഥലത്ത് അത്യാധുനിക സൗകര്യങ്ങളോടെ നിർമ്മിക്കുന്ന കെട്ടിടത്തിന്റെ നിർമ്മാണത്തിന്റെ ആദ്യഘട്ടത്തിലെ മണ്ണ് പരിശോധന അടക്കമുള്ള പ്രവർത്തികൾ ഉടൻ ആരംഭിക്കും.