എവിടെ നോക്കിയാലും നീണ്ട മുടിക്കാരികളെ മാത്രം കാണുന്നൊരു ഗ്രാമമുണ്ട്. അങ്ങ് ചൈനയിൽ ഹുവാങ്‌ഗ്ലോ എന്ന ഗ്രാമത്തിൽ. നീളൻ മുടിയുടെ ഗ്രാമമെന്ന് ഗിന്നസ് റെക്കാഡ് വരെ സ്വന്തമായുണ്ട്. യാവോ ഗോത്ര വർഗത്തിൽപെട്ട ഇവിടത്തെ സ്ത്രീകൾക്ക് മുടി വിശുദ്ധ വസ്തുവാണ്. ഐശ്വര്യത്തിന്റെ പ്രതീകമായി 2.1 മീറ്ററോളം നീളത്തിലാണ് ഇവിടത്തെ സ്ത്രീകൾ മുടി നീട്ടി വളർത്തുന്നത്. കറുത്ത് നീണ്ട മുടി പ്രായമായാൽ പോലും നരയ്ക്കാറുമില്ലത്രേ.

മുടിവളരാൻ ഇവരുപയോഗിക്കുന്ന സൂത്രം എന്താണെന്നോ?.. കഞ്ഞിവെള്ളം! ദിവസവും കഞ്ഞിവെള്ളം ഉപയോഗിച്ച് മുടി കഴുകും. വളരെ പണ്ടുകാലത്ത് ഇവരുടെ മുടിയിൽ നോക്കാൻ ഭർത്താവിനും മക്കൾക്കുമല്ലാതെ മറ്റാർക്കും അനുവാദം ഉണ്ടായിരുന്നില്ല. അന്യർ കണ്ടുപോയാൽ അവർ ആ യുവതിയുടെ വീട്ടിൽ മരുമകനായി മൂന്ന് വർഷം കഴിയേണ്ടി വരും. എന്നാൽ ഇതൊന്നും ഇപ്പോൾ ഇവർ ആചരിക്കാറില്ല.
ഇപ്പോൾ മുടി നീട്ടി വളർത്തുന്ന സ്ത്രീകൾ അത് ഗ്രാമത്തിന്റെ ടൂറിസം വികസനത്തിനായി ഉപയോഗപ്പെടുത്താൻ തുടങ്ങിയിരിക്കുന്നു. വിനോദ സഞ്ചാരികൾക്ക് മുമ്പിൽ മുടി നീട്ടി നൃത്തം ചെയ്ത് പ്രതിമാസം 20,000 ത്തിൽ അധികം രൂപയാണ് ഇവർ സമ്പാദിക്കുന്നത്. 82 വീടുകളിലായി 400 പേരാണ് ഈ ഗ്രാമത്തിലുള്ളത്. ജീവിതത്തിൽ ഒരിക്കൽ മാത്രമാണ് ഇവിടത്തെ സ്ത്രീകൾ മുടി വെട്ടുന്നത്. അതും പതിനെട്ടാം വയസിൽ മാത്രം. മുമ്പൊക്കെ വെട്ടുന്ന മുടി തങ്ങളുടെ മുത്തശ്ശിമാർക്ക് നൽകുകയും അവർ അത് തലപ്പാവായി മാറ്റുകയും ചെയ്യുമായിരുന്നു. എന്നാൽ ഇപ്പോൾ വെട്ടുന്ന മുടി യുവതികൾ വിവാഹം വരെ സൂക്ഷിച്ച് വയ്ക്കുകയും വിവാഹ ശേഷം വരന് സമ്മാനിക്കുകയും ചെയ്യുന്നു.
ഇത് പിന്നീട് മുടിക്കെട്ടിനായി ഉപയോഗിക്കുന്നു.

മൂന്ന് രീതിയിലാണ് ഇവിടത്തെ സ്ത്രീകൾ മുടി കെട്ടുന്നത്. വിവാഹിതരായവർ മുടി തലയ്ക്ക് മുകളിൽ വൃത്താകൃതിയിൽ കെട്ടിവയ്ക്കും. ഇവർക്ക് കുട്ടികളായിട്ടില്ലെന്നും അർത്ഥം. വിവാഹിതരായി കുട്ടികളുള്ളവർ മുടി മുന്നിലേക്ക് ബൺ ആക്കി കെട്ടിവയ്ക്കുന്നു. മുടി തുണി ഉപയോഗിച്ച് മറച്ച് കെട്ടിയവർ വിവാഹ പ്രായമെത്തിയവരാണന്നും വരനെ തേടുന്നുണ്ടെന്നുമാണ് അർത്ഥം.