ശാസ്താംകോട്ട: കാശ്മീരിൽ വെടിയേറ്റ് മരിച്ച സൈനികൻ പോരുവഴി കമ്പലടി തോട്ടത്തിൽ കിഴക്കതിൽ വിജയകുമാറിന്റെയും ശ്യാമളയുടെയും മകൻ വിശാഖിന് (22) പൂർണ ഔദ്യോഗിക ബഹുമതികളോടെ വിട. ഇന്നലെ രാവിലെ 10ന് ജന്മ നാട്ടിലെത്തിച്ച മൃതദേഹം, ആദ്യം ഇദ്ദേഹം പഠിച്ച പോരുവഴി കമ്പലടി ഗവ. എൽ. പി സ്കൂളിൽ പൊതു ദർശനത്തിന് വെച്ചു. 12 മണിയോടെ വീട്ടിലെത്തിച്ചെങ്കിലും ജനത്തിരക്ക് കാരണം ഒരു മണിക്ക് ശേഷമാണ് സംസ്കാരത്തിന്റെ നടപടികളിലേക്ക് നീങ്ങിയത്. പൊലീസും സൈനികരും അന്ത്യോപചാരം അർപ്പിച്ചു. പിന്നീട് വീട്ടു വളപ്പിൽ സംസ്കരിച്ചു. ശക്തമായ മഴയിലും ആയിരങ്ങളാണ് സൈനികനെ അവസാനമായി ഒരു നോക്ക് കാണാനെത്തിയത്. രണ്ട് വർഷം മുൻപ് ജോലിയിൽ പ്രവേശിച്ച വിശാഖ് കാശ്മീരിലെ ഉറി സെക്ടറിൽ വച്ചാണ് വെടിയേറ്റ് മരിച്ചത്. സഹോദരൻ വിമലും സൈനികനാണ്.

തേങ്ങലോടെ ആയിരങ്ങൾ

കാശ്മീരിൽ വെടിയേറ്റ് മരിച്ച സൈനികൻ വിശാഖിന് അന്തിമോപചാരം അർപ്പിക്കാൻ നൂറുകണക്കിനാളുകളാണ് എത്തിച്ചേർന്നത്. എം.പിമാരായ കൊടിക്കുന്നിൽ സുരേഷ്, കെ. സോമപ്രസാദ്, എൻ.കെ. പ്രേമചന്ദ്രൻ, കോവൂർ കുഞ്ഞുമോൻ എം.എൽ.എ, ഡി.സി.സി പ്രസിഡന്റ് ബിന്ദുകൃഷ്ണ, പായിക്കാട്ട് കേശവപിള്ള, ശാസ്താംകോട്ട ബ്ലോക്ക് പഞ്ചായത്ത് പ്രസിഡന്റ് വി. അരുണാമണി, എ.ഡി.എം പി.ആർ. ഗോപാലകൃഷ്ണൻ, തഹസിൽദാർ ബി. ലിസി, ഡിവൈ.എസ്.പി നാസറുദ്ദീൻ, സി.ഐമാരായ വി. പ്രശാന്ത്, വി. ജയചന്ദ്രൻ പിള്ള തുടങ്ങിയവർ വിശാഖിന് അന്തിമോപചാരമർപ്പിച്ചു.